Mula sa Pagkabalisa Tungo sa Kapayapaan Halimbawa

Sa Mga Taga-Filipos 4:6-7, hinahamon tayo ni Apostol Pablo na huwag mabalisa para sa anumang bagay. Sa halip, kailangan nating manalangin at magpasalamat. Madaling magpasalamat sa Diyos sa ating tagumpay o pagkatapos makatanggap ng isang mahimalang pagsulong. Ngunit makikita natin na tayo'y tinatawag upang gawin ito maging sa gitna ng ating mga pagpupunyagi.

Sa panahon na isinulat ito ni Pablo para sa Simbahan ng mga taga-Filipos, nakakulong siya at walang katiyakan ang kanyang hinaharap. Subalit, tumanaw siya nang lampas sa kanyang sitwasyon at hindi nanatili sa maaaaring masamang kahihinatnan. Ang kanyang sulat ay sumasalamin sa kanyang malalim na kagalakan at masayang saloobin. 

Dalawang talata bago tayo tinawag upang isatinig ang ating pasasalamat, inutusan niya tayong laging magalak. Sa pagsasabi sa ating "laging" magalak, nagpapahiwatig ito ng patuloy o nakaugaliang kagalakan. Pagkatapos, upang idiin ang kanyang punto, kaagad niyang inulit ang utos, "Inuulit ko, magalak kayo!" Ipinapakita niya sa atin na kahit na sa gitna ng ating nararamdamang kirot, maaari nating piliin ang kagalakan at purihin ang Diyos.