Soma Biblia Kila Siku Februari 2021Mfano

Kweli, dhambi zilizidi mno katika mji wa Sodoma (m.4-5,Wenyeji wa Sodoma, wakaizunguka nyumba, vijana kwa wazee, watu wote waliotoka pande zote.Wakamwita Lutu, wakamwambia, Wa wapi wale watu waliokuja kwako usiku huu? Uwatoe kwetu, tupate kuwajua)! Inaonekana walizoea sana kufanya uasherati wanaume kwa wanaume. Na walipofika wanaume wageni wakawatamani. Hawana utu kabisa. Dhambi hii ya wanaume kulala na wanaume ni matokeo ya watu kumwasi sana Mungu. Ni matokeo ya ghadhabu ya Mungu kudhihirishwa kutoka mbinguni juu ya uasi wote na uovu wa wanadamu waipingao kweli kwa uovu, na Mungu kuwaacha wafuate tamaa zao za aibu, “hata wanawake wakabadili matumizi ya asili kwa matumizi yasiyo ya asili; wanaume nao vivyo hivyo waliyaacha matumizi ya mke, ya asili, wakawakiana tamaa, wanaume wakiyatenda yasiyopasa, wakapata nafsini mwao malipo ya upotevu wao yaliyo haki yao” (soma mistari yote ya Rum 1:18-27 kwa ufafanuzi zaidi). Lutu alijua tabia yao na huenda aliwahi kuwakemea (taz. wenyeji wanavyosema kuhusu Lutu katika m.9: “anataka kuhukumu”). Ndiyo sababu aliwasihi sana hao wageni kuingia chini ya dari lake, maana alijua watatendewa vibaya na watu wa mji wake (m.2-3,Akasema, Bwana zangu, karibuni nawasihi mwingie nyumbani mwa mtumwa wenu, mkalale, mkanawe miguu yenu, hata asubuhi mwondoke na mapema mkaende zenu. … Akawasihi sana).