Ura për te MarkuShembull

Predikimi tallës i Pilatit

Pilati i urdhëroi ushtarët të shkruanin në një copë druri “krimin” për të cilin Jezusi ishte i akuzuar. Ai po tallej me judenjtë, kur u tha ushtarëve të shkruanin “Mbreti i judenjve”. Pilati kishte vënë re se si kryepriftërinjtë dhe skribët e urrenin Jezusin. Meqë ata priftërinj e kishin bërë këtë mëngjes një mëngjes të tmerrshëm, Pilati do t’ua kthente me të njëjtën monedhë, duke shkruar diçka që e dinte se ata do ta përçmonin.

Perëndia është në kontroll, madje edhe për talljen e Pilatit. Ai e lejoi që të ndodhte, në mënyrë që fjalët e Pilatit të bëhen një predikim për ne. Perëndia mund t’i ketë përdorur fjalët e Pilatit, për të kthyer në besim një nga dy hajdutët që u kryqëzuan pranë Jezusit.

Jezusi është Mbreti i Judenjve, por Ai është gjithashtu më shumë se kaq: Ai është Mbreti i mbretërve dhe sundon mbi gjithë tokën! Shumica e njerëzve nuk i binden Atij dhe as nuk e mendojnë Atë si Mbretin e tyre. Por Ai sërish është. Pasi u ngjall nga vdekja, Ati i Tij e bëri Mbret mbi gjithë tokën. Judenjtë menduan që e hoqën qafe Jezusin kur e vranë. Ushtarët u tallën me Të. Pa pasur fare respekt, e gozhduan në kryq. Pas kësaj, ata i ndanë rrobat e Tij. Asnjë prej tyre nuk pati fare dashuri për këtë Mbret, dhe sigurisht nuk patën fare dëshirë për t’iu bindur Atij.

Çfarë keni bërë me këtë Mbret? E shpërfillim Atë kur bëjmë atë që dëshirojmë të bëjmë, edhe pse e dimë se cila është gjëja e duhur që duhet të bëjmë. E ofendojmë këtë Mbret kur tallemi me gjërat e Perëndisë. Perëndia ju thërret t’i bindeni Zotit Jezus si Mbret dhe t’i besoni Atij si Prift. Përkulini gjunjët para Tij sot. Mendoni për mëkatet që keni bërë: krenari, egoizëm, dashuri për njerëzit apo për gjërat më shumë sesa për Të; fjalë pa respekt; ose tallje e atyre që janë më të vegjël dhe më të dobët. Falënderoni Zotin që ju ka kursyer, edhe pse nuk e meritoni të jetoni në tokën e Tij. Rrëfejani mëkatet tuaja dhe kërkojini falje; ky Mbret është gati ta ofrojë. Besojini Atij kur premton të na i falë mëkatet. Sa të lumtur janë ata që kanë një Mbret të tillë, Mbretin Jezus!