LydenstydSample

'n Seun Terugverwelkom

Lees: Lukas 15:11–32

SOAP: Lukas 15:23–24

“'En bring die vetgemaakte kalf, slag hom, en laat ons eet en feesvier! Hierdie seun van my was dood, en hy lewe weer; hy was verlore, en ek het hom teruggekry.' Toe het hulle begin feesvier."

Oordenking

Jesus het vir sy dissipels 'n gelykenis vertel van 'n seun wat sy pa se huis verlaat het. Hierdie seun het nie vir sy rykdom gewerk nie, want dit was die vader wat hulle groot rykdom verwerf het. Die seun het sy erfporsie geneem en weggegaan. Baie gou het hy al sy geld spandeer en het hy niks gehad om te eet nie. Hy het begin werk in die mees vernederende omstandighede, maar hy was steeds sonder kos. Uiteindelik het hy tot besinning gekom en huistoe gegaan.

Met geen verwagting om verwelkom te word nie, het die seun na sy huis teruggekeer en nederig voor sy vader verskyn. Die vader het egter gejubel oor sy seun se terugkeer. Hy het 'n feesmaal voorberei en gejuig dat sy verlore seun uiteindelik by die huis was.

Dit is hoe Jesus ons verwelkom wanneer ons na Hom toe kom. Ons sonde het ons na plekke en dieptes geneem waaruit ons self nooit kon kom nie. Wanneer ons ons egter bekeer en na die Vader toe terugkeer, word ons verwelkom soos hierdie seun verwelkom is. Ons hemelse Vader jubel wanneer ons na Hom toe terugkeer.

Wat 'n glorieryke waarheid om te weet dat ons deur Jesus gered is. Ons het so baie van Hom ontvang en Hy het al die werk daarvoor gedoen. Net soos die seun nie enige van die rykdom verdien het nie en ook nie verdien het om by die huis verwelkom te word nie, word ons in die familie van God verwelkom en deel ons in al die rykdom van Christus. Hy het ons verhouding met Hom deur sy genade alleen herstel. Mag ons nederig wees en na Hom toe terugkeer, dit maak nie saak hoe ver ons weggedwaal het nie.