Spreuke – eenjaarleesplanSample

Die pa borduur voort op die versoeking van die vreemde vrou en waarsku al sy seuns teen die effek wat ontrouheid in die huwelik op jouself kan hê. Hy waarsku hulle dat hulle nie hulle beste jare vir 'n hartelose mens moet gee nie. Let op hoe realisties die pa die gevolge skets. ‘n Verhouding met ‘n vreemde vrou – ‘n vrou wat met iemand anders getroud is – het ekonomiese en patologiese gevolge. Jy doen jouself daardeur finansiële- sowel as liggaamlike skade aan. Jy gaan geld verloor sowel as jou gesondheid.

Met ontrouheid loop jy dus die gevaar dat jy uiteindelik jou welvaart met ander moet deel – dink aan die moderne problematiek van onderhoud met egskeidings – sowel as die gevaar van siektes wat jy sal moet trotseer. Jy sal boonop ook deur jou gewete aangekla word.

Ontrouheid in die huwelik is nie speletjies nie! Spreuke sê dit lei tot ’n private hel en openbare skandes. Natuurlik is daar genade en vergifnis – so leer ons in die Nuwe Testament. Onthou, voorsorg is beter as nasorg.