Spreuke – eenjaarleesplanSample

Die pa waarsku sy seun in die vierde plek teen onreg, om byvoorbeeld nie uit twee monde te praat nie. Om nie een ding te sê, maar dan ’n heel ander ding te bedoel nie. Sulke misleiers is deugniete en kwaaddoeners. Hulle bewerk onheil en onreg. Hulle saai twis en tweedrag. Hulle valse woorde kom duidelik uit valse harte.

Daar is egter meer. Deur sulke mense as deugniete – bĕliyyaʿal in Hebreeus – te beskrywe, verbind die Bybel hulle onreg nie net met ’n inherente boosheid (Spreuke 16:27) of bose gedrag nie (Eli se twee seuns word in 1 Samuel 2:12 so beskrywe), maar met die bose self.

Dit sien ons ook in die Nuwe Testament dat die Satan as Belial (Griekse vertaling van bĕliyyaʿal) beskryf word. Deugniete word dus as dienaars van die duiwel beskou. Dit is waarom gelowiges nie in geloofsgemeenskap met sulke ongelowiges mag verkeer nie (2 Korintiërs 6:15). Daar is geen gemeenskap tussen Christus en Belial nie. Ons durf dus nie deelgenote wees van ’n gemeenskap van deugniete nie. Dit benadeel ons gemeenskap met Christus.