Spreuke – eenjaarleesplanSample

Vir die wysheid egter om sy werk te kan doen, is dit lewensbelangrik dat hierdie pad, die pad van wysheid, gekies word, en die pad van goddeloosheid vermy word. Die pa borduur daarom in die “sesde lewensles” verder voort op die soeke na en voordele van die keuse om op die "regte pad" te bly (Psalm 18:37).

Sy onderrig is gegiet in die vorm van ’n belofte wat as deel van die Woord van God ’n belofte aan elke gelowige word wat die wysheid najaag: “... aanvaar my woorde sodat jou lewensjare baie kan wees.” Let op die oorbeklemtoning in die gedeelte om die punt te maak dat die wysheid meer voordelig is as die dwase pad van goddeloosheid en misdaad: daar sal niks in jou pad wees nie, jy sal nie struikel nie (Spreuke 4:12).

Gryp hierdie belofte vir jouself aan. God sal jou begelei op die pad van wysheid. Hy sal jou paaie reguit maak sodat jy vry kan beweeg, vinnig of stadig. Hy sal jou van struikeling bewaar, maar dan moet jy ook sy vermaning aanvaar en daarby hou. Vermaning of teregwysing hou jou op die pad van die lewe.