Die Belangrikheid Van GebedSample

Nader God met Vertroue

Lees: Hebreërs 4:15–16

SOAP: Hebreërs 4:16

Kom ons gaan dan met vrymoedigheid na die genadetroon, sodat ons barmhartigheid en genade ontvang en so op die regte tyd gered kan word.

Oordenking

In die Israelitiese offerstelsel was die hoëpriester 'n advokaat vir die volk. Die hoëpriester reinig eers homself en bring ‘n offer vir sy eie sondes. Dan sou hy namens die volk in die tempel ingaan en 'n offer bring vir al hulle sondes. Hy was die verteenwoordiger van die vergadering en het offers aan God gebring, sodat die hele volk van hulle sonde gereinig kon word.

Jesus is ons Hoëpriester. Anders as die priesters in die Ou Testament, was Jesus sondeloos. Hy alleen is in staat om 'n blywende offer vir ons sondes te bring, omdat Hy self geen sonde gehad het nie. Alhoewel Hy nie gesondig het nie, is Hy steeds in staat om empatie te toon met ons swakhede, omdat Hy mens geword het. Deur Homself te verneder en die mensdom aan te neem, kan Jesus ons Hoëpriester wees. Hy is ons verteenwoordiger, die advokaat wat vir ons by God intree.

As gevolg van sy opoffering hoef ons niks te vrees nie. Ons kan met vertroue tot God nader, ongeag wat ons gedoen het. Ons sondes word vergewe en ons verhouding met God word herstel. Ons Hoëpriester gaan voor ons uit en bied ons genade en barmhartigheid, omdat Hy ons swakhede ken. Ons het 'n oop uitnodiging om tot Hom te nader, veral in ons swakhede en ons tekortkominge.

Benut jy die voorreg wat jy het om vrymoedig in gebed tot God te gaan? Gee jy jou vreugde, pyn, stryd en angs aan Hom oor en vertrou dat Hy die enigste Een is wat berge vir jou kan versit? Sal jy vandag begin om alles wat jy beleef, goed en sleg, in gebed met die Here te deel?

Gebed

Vader, ek dank U dat U vir my 'n Verlosser gestuur het, want ek het elke dag redding nodig. Wanneer dit my instink is om van U te wil wegvlug, as my neiging is om vir U weg te kruip, as my drang is om vir U te jok, herinner my daaraan dat U my swakhede intiem ken, en deernis en barmhartigheid vir my in oorvloed het wanneer ek alles in nederigheid voor u troon kom neerlê. In die Naam van Jesus, amen.