ဘုရားသခင်၏ မဟာကတိတော်များနမူနာ

ဤအရာသည် အပြစ်တရား၌ကျဆင်းခဲ့သောလူသားများအဖို့ ပထမဦးဆုံး ကတိတော်မြတ် ဖြစ်သည်။ ကတိတော်တွင်၊ မိမိလူမျိုးတော်ကို ကယ်တင်ရန် ဘုရားသခင်၏ ထာဝရအကြံအစည်တော်၊ ကျေးဇူးတော်၏ ပဋိညာဉ်နှင့် စုံလင်သောဧဝံဂေလိရားတို့ပါဝင်သည်။ ထိုအရာတို့သည် စုံလင်လျက် ရှိပြီဖြစ်သည်။ မိန်းမ၏ အမျိုးအနွယ်ဖြစ်သော သခင်ယေရှုသည်၊ သူ၏ ဖနောင့်ကို ကြိတ်ခံခဲ့သောအခါ၊ လောကငရဲဒုက္ခဝေဒနာကို ရရှိခံစားခဲ့လျက် ၎င်းဒုက္ခဝေဒနာသည် အလွန်တရာ ဆိုးဝါးခဲ့သည်။ နောက်ဆုံးကာလ၌ မြွေ၏ ခေါင်းကြိတ်ခြင်းသည် သာ၍ဆိုးဝါးလိမ့်မည်တကား။ အရှင်ယေရှုဘုရားသည် အပြစ်တရားကို ဖယ်ရှားပြီး၊ သေမင်းကို အောင်လျက် မာရ်နတ်၏ တန်ခိုးကို ချိုးဖဲ့ဖျက်ဆီးသောအခါ မြွေ၏ ခေါင်းကို ကြိတ်ခဲ့သည်။ သို့သော်၊ ကျွန်တော်တို့၏သခင် ဒုတိယအကြိမ်ကြွလာခြင်းနှင့် တရားစီရင်ရာနေ့၌ ပိုမိုပြည့်ဝစုံလင်ပါလိမ့်မည်။

ဤကတိတော်သည် ကျွန်တော်တို့အဖို့ ပရောဖက်ပြုချက်တစ်ခု ဖြစ်ပြီး၊ ကျွန်တော်တို့၏ သင်္ခါရလောကရှိ အသက်တာတွင် မကောင်းဆိုးဝါးတန်ခိုးဖြင့် ညှဉ်းပန်းနှိပ်စက်ခြင်းကို ခံရလျက်၊ ကျွန်တော်တို့၏ ဖနောင့်ကို ကြိတ်ခံနေရမည်။ သို့ရာတွင်၊ ရှေးမြွေဟောင်း၏ ခေါင်းကို ကြိတ်သူတည်းဟူသော ခရစ်တော်အားဖြင့် ကျွန်တော်တို့သည် အောင်မြင်ချမ်းသာအခွင့် ရရှိခံစားပါသည်။ ဤနှစ်တွင်၊ မာရ်နတ်၏ စုံစမ်းသွေးဆောင်မှုများနှင့် မာရ်နတ်၏ သားများတည်းဟူသော အဓမ္မလူများ၏ မကြင်နာမှုတို့ကို ကိုယ်တိုင်ကြုံတွေ့ခြင်းဖြင့် ဤကတိတော်၏ တစ်စိတ်တစ်ပိုင်းကို သင်ယူရပေမည်။ ထိုသူတို့သည် ကျွန်တော်တို့၏ ဖနောင့်များကို ကြိတ်သောကြောင့် နာကျင်စွာ ထော့နဲ့သွားစေနိုင်ပါသည်။ သို့ရာတွင်၊ ကျွန်တော်တို့သည် ဤကျမ်းပိုဒ်၏ ဒုတိယအပိုင်းကို နားလည်သဘောပေါက်လျှင် စိတ်ပျက်ခြင်းသို့ မရောက်နိုင်ကြပေ။ ကျွန်တော်တို့သည် မိန်းမ၏အမျိုးအနွယ်တည်းဟူသော အရှင်ယေရှုဘုရားနှင့်အတူ စိုးစံလိမ့်မည်ဟု ယုံကြည်ခြင်းအားဖြင့် ဝမ်းမြောက်ကြပါစို့။