DUUCA 13

Tötö’tajäätödö sha’duminchadö tujunne yeichö

1Yaawä dea mma anejjacoomo cöneejoto Jesuuquidiito döiña. Tönwanno chäwwä cöneecammajä’a’to Pidaato wwä Caadideea ñancomo töjaajo’jocoomo jäcä, saaquidiijiisiyo tödöödawä chäwwäiñe. Yaawä Pidaato tömjajo’jocoomo aquiiyöcoomo cönoimai saaquidiijiisiyo iiñö’jocoomo aquiiyö jadä. 2Jesuuquidiito cönä’döaacä chäwwäiñe:

—¿Conemjöncomo’cä jaiñoone atäi cha ñanno Pidaato nöjaajo’jocoomo mecaanö’ato, anejjacoomo Caadideea ñancomo e’jodheiñe’cä, yääje yäätä’maminchajo’jocoomo weijäcä? 3Ng’jn, yääje’daane. Chäänönge yääje wä’döa äwwäiñe, tameedä änwanno mmaja, ätö’tajäätödööcomo änsa’dumincha’da aweiya’comjäcä, chäänöngeiñe mmaja männanö’ato’dede. 4¿Ñanno ’na, juujatonnoto de’wä aaduwaawo’como soto Siidoé ña cönä’jajoichodö, yää maa cawooto ye’cäiñe cöne’ducaichawä? ¿Conemjöncomo’cä jaiñoone atäi cha mecaanö’ato, tameedä anejjacoomo Jeduusadén ñancomo e’jodheiñe? 5Ng’jn, yääje’daane. Chäänönge yääje wä’döa äwwäiñe, tameedä änwanno mmaja, ätö’tajäätödööcomo änsa’dumincha’da aweiya’comjäcä, chäänöngeiñe mmaja männanö’ato’dede; que cönä’döaacä Jesuuquidiito.

Waju’nä täjössemjönö dö’seeno

6Edääje mmaja Jesuuquidiito cönä’döa’dea chäwwäiñe yö’seeno joi:

—Dhanwa waju’nä cönnatö’tai tönaudä’jödö aca. Äcuude cöneiyacä yaawä chääjedöödö töjä’e. Täjösse’da cöneedantäi. 7Töwö cönä’döaacä audaajä edai’chänei wwä: “Aaduwaawä wedu wä’döi eduuwa chääjedöödö töjä’neije we’jä’näje; täjösse’da dea töneedantä wäänene. Yaacacä, töwäädä mma nono täde’da nödööa;” quee cönä’döaacä ñäädä audaajä edhaajä. 8Yaawä ñäädä audaajä edai’chänei cönä’döaacä: “Cajiichaana, edä wedu mmädä mädääje nei’ñojo, nono dhawoodhecääcä naadö wishaaca’näiye, yaatö’no’jotoojo womjajoiye dhaca. 9Yaawä ejössataajai chö’tadö na. Ejössata’da dea yeiya’jäcä yaawääne yaacacä’de;” quee cönä’döaacä ñäädä audaajä edai’chänei; quee cönä’döaacä Jesuuquidiito.

Wäädeetatoojo anootoi’chädö awä wodi ejiichö’tä’jödö

10Yaawä wäädeetatoojo anooto awä Jesuuquidiito soto cönoowanooma’to we’jummatoojo taca. 11Yäätä cönä’jaacä wodi juujatonnoto de’wä aaudwaawä wedu odo’sha woije chäädäicha’jödö. Tommodhe töwämmannä’e cönä’jaacä, esa’duminchajai’cha. 12Ñäädä eneea’jäcä Jesuuquidiito wwä, töwö cöna’dejjai; cönä’döaacä chäwwä:

—Amäädä wodi, töwääjichö’tä ma eduuwa; quee cönä’döaacä.

13Yaawä töwö Jesuuquidiito tamäädö cönnöi ye’wä. Yaawä dea mma ñäädä wodi cöneesa’duminchai. Aashicha Wanaadi jäcä cöna’deuwöi yaawä. 14Yaawä ñäädä we’jummatoojo edhaajä cönäätömai wäädeetatoojo anootoi’chädö awä ejiichö’tä’jödö weijäcä Jesuuquidiito wwä. Töwö cönä’döaacä soto wwäiñe:

—Tooni amoojato anooto na wetaadawa’cajootojo. Yää anooto awääne ääjichö’täjo e’jai maato, wäädeetatoojo awä’daane; quee cönä’döaacä.

15Yaawä Cädhaajotoncomo cöneccujä’acä; cönä’döaacä:

—Yääjönö wa’co’como wäänejoodö änwanno. ¿Adheecönööcomo ani’wadööca’da ca töweiye määnetääne wäädeetatoojo anootoi’chädö awä, tuna emjo adäädö wetä? 16Töwaacö’je määdhä wodi, Aawadán weichö, wäädeetatoojo anootoi’chädö awä täde’tanö’emje nä’jaanä, yää Caajuushawa nichäädä’ñä’jödö awä juujatonnoto de’wä aaduwaawä wedu i’wadö’taajä nönge nä’jannö; quee cönä’döaacä Jesuuquidiito.

17Mädääje yä’dö’jödö weijäcä tameedä chu’de’tännamo cöneejöichoicho. Soto mmaane cöna’cwainchaicho Jesuuquidiito wwä aashichaato tödöödö eneedö’jo.

Wishu adöödö dö’senno

18Yaawä Jesuuquidiito cönä’döaacä:

—¿Ane’cäämö nönge Wanaadi cajiichaanaje yeichö nai, quee ’ja? ¿Ane’cäämö yö’seenoje ecammato’me nai, quee ’ja? 19Wishu adöödö töweiye naichöje na, dhanwa niñaatö’tä’jödö tönaudä’jödö aca. Yää a’tajai ña yaawä adai’jä tödööene, dee wa’cä. Tadiiñaamo taiñamöichomo amääjai yaawä dhajäädö jäcä; quee cönä’döaacä Jesuuquidiito.

Äwanshi ummannä’cajootoojo dö’seeno

20Edääje mmaja Jesuuquidiito cönä’döa’dea:

—¿Ane’cäämö Wanaadi cajiichaanaje yeichö dö’seenoje ecammato’me nai, quee ’ja? 21Yää na äwanshi ummannä’cajootoojo töweiye naichöje. Yää ummannä’cajootoojo wodi tödööjai ñaadö naane’ aaduwaawä taasa äiñe ajooajä aca, tameedä yummamöödö wetä; quee cönä’döaacä Jesuuquidiito soto wwäiñe.

Mönaatata she’coto’cä

22Yaawä Jesuuquidiito cöntaacä Jeduusadén ña, jata waadäi soto owaanomancädäiñe. 23Yääje mma yaawä anejja cöneecamma’joi:

—Cajiichaana, ¿wanna’da mma ca töwääwanaacaamo naicho? quee cönä’döaacä.

Jesuuquidiito cönä’döaacä:

24—Mönaatata she’coto’cä ai owoomomöödöcoomo encano’tätääcä. Yääje wä’döa äwwäiñe, jooje naato’de töwoomomö’sa’como; omomjai’chaane. 25Maa edhaajä wwä mönaatata a’dua’jäcä änwanno jödo’na määdantaato’de yaawä, mönaatata a’ducaajodööje. “Cajiichaana, ñaa wwä a’ducaacä;” quee mä’döaato’de. Yaawä töwö adheccujä’aato’de: “Yoowanääcä’da maato, äshancomo ca änwannodö jääcä;” quee nä’döa’de. 26Yaawä maajäntaato’de edääje äwä’dödööcomo: “Adö’tä töwääwashinchä ñaa cönä’jaacä. Adö’tä dea töwoocödö tönenque ñaa cönä’ja’dea. Ñaa jataawä tönoowanooma mä’jaaquennea;” quee mä’döaato’de. 27Töwö adheccujä’ato’de yaawä: “Yoowanääcä’da maato, äshancomo ca änwannodö jääcä. Ojoncomo jonno, änwanno conemjönö dönnamo;” quee maa edhaajä nä’döa’de äwwäiñe. 28Iiña maamoaato’de; jooje cone’da maato’de, äwwäiñe eneea’jäcä Aawadán, Isaaca mmaja, Jacoowo mmaja, tameedä Wanaadi wa’deuwödö ecammannamo’jödö mmaja töcaajichaanaichomo Wanaadi jataawä, jödo’na änwanno aweichaameiñe. 29Shii weja’catoojo dö’senno soto ne’aato’de, shii womontojo dö’senno mmaja, shii womontojo suda’wawonno mmaja, shi weja’catoojo suda’wawonno mmaja. Ääwashinchä nataajimaato’de töcaajichaanaichomo Wanaadi jataawä. 30Yaawä ema’jödööje naatoodö dhantai täneejuque naato’de. Ñanno eduuwa täneejuque naatoodö mmaane dhantai ema’jödööje naato’de; quee cönä’döaacä Jesuuquidiito soto wwäiñe.

Jeduusadén ñancomo junnei Jesuuquidiito waamo’jödö

31Yää anooto awä dea anejjacoomo jaadiseeo cönä’döicho Jesuuquidiito döiña; cönä’döa’to chäwwä:

—Äjääne eetonno. Edoodhe dajaane adheema’se na; quee.

32Töwö cöneccujä’a’to; cönä’döaacä chäwwäiñe:

—Ojoncomo Edoodhe döiña, ñäädä yääjönö nöngato wätäncu’tädö döiña. Edääje caichäcä’de chäwwä: “Yääje Jesuuquidiito cönä’döaacä: Eduuwa, jenamma mmaja, taadawaajui tödöödöje dea wa’de, yää odo’shancomo ija’canö’jodööcomo, soto ejiichö’tädööcomo mmaja; jenammato ncadheedä wä’ca’de taadawaajui dödö; quee Jesuuquidiito cönä’döaacä;” quee caichäcä’de Edoodhe wwä. 33Taadawaajui tödöödöje dea weichojo na eduuwa, jenamma mmaja, jenammato ncadheedä mmaja. ¿Aaquene Jeduusadén ña’da Wanaadi wa’deuwödö ecammanei äämadö deeade’ ?

34“Änwanno Jeduusadén ñancomo, Wanaadi wa’deuwödö ecammannamo töja’nnamo, äwwadäädäiñe anonta’como täju que töwääjä’nnamo; wameedi tönnacoomo tajä’sai o’nä tönnöe naichöje dea öwwadäädä adheenejö’seiñe wääneneedö’je, yääje awei’sheiñe’daane’ änwanno. 35Eneetäcä’ma anaamädööcomo to’nomja naadö. Änwanno yeene’da maato’de yääje äwä’dödööcomo wa’cä: “Aashichaato mä’dä Cajiichaana eetö joiño we’ajä;” quee äwä’dödööcomo wa’cä; quee cönä’döaacä Jesuuquidiito.

നിലവിൽ തിരഞ്ഞെടുത്തിരിക്കുന്നു:

DUUCA 13: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക