DUUCA 14

Töwaawojä’ato adonca’jödö

1Yääje mma yaawä wäädeetatoojo anooto awä Jesuuquidiito cönoomomöi jaadiseeo täneejucaato mmai chaca, ääwashinchä. Anejjacoomo jaadiseeo yäätä cönä’ja’to dea chu’de’tä’se ene’madööje. 2Yäätä Jesuuquidiito je’taca cönä’jaacä dhanwa töwaawojä’ato. 3Yaawä Jesuuquidiito cöneecamma’joicho ñanno judhío owaanomannamo, jaadiseeocoomo mmaja:

—¿Aashicha ca wäädeetatoojo anooto awä soto adoncadö töweiye nai, cone’daane? quee cönä’döaacä.

4Tönwanno äucwätä’da cönä’ja’to. Jesuuquidiito ñäädä dhanwa töwaawojä’ato cönaajäi yaawä; cönaadoncai. Cönenno’jai yaawä. 5Töwö cönä’döaacä jaadiseeo wwäiñe:

—Wäädeetatoojo anooto awä ya’tadö aca adheecönööcomo wejucca’jäcä, ¿yaawä dea mma anu’ca’da ca eijai maato? quee cönä’döaacä.

6Tönwanno yää eccujä’jai’cha cönä’ja’to.

Jötaanä ene ajä’ma’como

7Yaawä Jesuuquidiito cöneene’ma’to ñanno ajä’ma’como täneejuca’como weicho’como dö’tä töwaatajiima’se yeichöcoomo. Töwö edääje cönwätuujaicho:

8—Anejja wwä jötaanä ene adha’dejja’jäcä, täneejuca’como weicho’como dö’tä mma mataajimai’che. Yaawä adhe’jodhaato we’a’jäcä naadö naane’, töwaajä’maamö’jödö mmaja, 9ñäädä a’nädä adhaajä’maneichomo’jödö e’jai naadö naane’ yaawä, töwö äwwä ä’döjai ña yaawä: “Ääsecaacä; määdhääne määtä nei’ñojo;” quee ä’döjai ña. Yaawä töjöiye ääsecaajai ma dho’noncomo weicho’como dö’tä. 10Edääjeene eichä adhaajä’ma’jäcä: Dho’noncomo weicho’como dö’tääne ataajimaacä’de. Yaawä ñäädä adha’dejjanei’jödö we’a’jäcä, edääje äwwä ä’döjai ñaadö naane’: “Eetääne ataajimaacä weichacoono, täneejuca’como weicho’como dö’tääne;” quee ä’döjai ña äwwä. Aashichaatoje adheene’maato’de yaawä ñanno ajaadoncomo wääwashinchädö. 11Ñäädä o’jodhaato tö’tajäätödö dho’noncomooje nä’döja’de. Ñäädä dho’noncomo tö’tajäätödö o’jodhe nä’döja’de; quee cönä’döaacä Jesuuquidiito.

12Edääje Jesuuquidiito cönä’döa’dea ñäädä ta’dejjanei’jödö wwä:

—Awaajä’ma’jäcä ajimmä mma mana’dejjaicho’de, adhaacontomo mmaja, ajaatawoncomo tönaudäca’como mmaja. Tönwanno yää ’jeje ääwashinchä adha’dejjajai ñaato dea, yää ta’dejja’jocoomo nwacaanoje. Yää que mma täjeema ma yaawä. 13Edääjeene eichä’de awaajä’madaawä; wentumja’comoone ana’dejjacooto’de, cädäija’como mmaja, secumja’como mmaja, tänuuquemjöncomo mmaja. 14Yaawä ta’cwaiñe eijai ma, ñanno adheejemaajai’cha yeichomjäcä. Yaawä jeene määjemaaja’de, chäänönga’como waadoncato’como awä jeene; quee cönä’döaacä Jesuuquidiito.

Jooja’como soto wääwashincho’jocoomo dö’seeno

15Yää eta’jäcä tooni chääjadä cönääwashincha’dö cönä’döaacä Jesuuquidiito wwä:

—Ta’cwaiñe na’de ñäädä Wanaadi jataacaiño wääwashinchädö; quee cönä’döaacä.

16Yaawä Jesuuquidiito cönä’döaacä chäwwä:

—Dhanwa cönaajä’mai; jooje soto cöna’dejjaicho yaawä. 17Yaawä wääwashinchotoojo cu’nädö aca yä’döa’jäcä töwö tanoonö cönaanontäi ñanno töwääwashinchaamo wwäiñe ecamma: “Ä’täcä eduuwa; äwanshi nödöicho;” quee ä’döe. 18Yaawä tameedä ñanno a’dejja’como töwaadäiñe cönaajäntoicho töwäätä’catäädöcoomo. Tooni cönä’döaacä: “Audaajä wejeemane. Eduuwa ene öötotoojo na. Eejö’da na ñäädä; quee caichä’de adhaanontänei’jödö wwä;” quee cönä’döaacä. 19Anejja cönä’döaacä: “Amoojadä jaaca wejeemaneeto; eneiñe wöta eduuwa. Eejö’da na ñäädä; quee caichä’de adhaanontänei’jödö wwä;” quee cönä’döaacä. 20Anejja daja cönä’döa’dea: “Ijöötaanö öwö. Täjai’cha wa;” quee. 21Ñäädä dhanoonö cönennacai yaawä. Töwö tädhaajä wwä cöneecammajäätöi yääje yä’dö’jocoomo. Chäädhajä cönäätömai yaawä; tanoonö cönaanontäi; cönä’döaacä: “Jata antai äjääne. Wentumja’como a’dejjataato, cädäija’como mmaja, secumja’como mmaja, tänuuquemjöncomo mmaja;” quee cönä’döaacä chäwwä. 22Äcuude’cä ñäädä dhanoonö cönä’döaacä yaawä: “Cajiichaana, anaanontä’jödö wödöi. Yääje yeichaame töweiye dea na soto weicho’como;” quee. 23Yaawä chäädhajä cönä’döaacä chäwwä: “Ääma waadäi äjääne; anejjacoomo ene’coto’de yoijeiñe’da; ömmai chu’camöiye. 24Yääje wä’döa äwwäiñe, tameedä ñanno awa’de wa’dejjaneetodö onooneja’da naato’de edä äwanshi, neejodööjodö;” quee cönä’döaacä ñäädä chäädhajä tanoonö wwäiñe; quee cönä’döaacä Jesuuquidiito.

Jesuuquidiito jadä weiñä

25Yaawä jooje soto cönäämannä’a’to Jesuuquidiito jadä. Töwö cönä’jedennacai chäwwadäädäiñe; cönä’döaacä chäwwäiñe:

26—Ñäädä jaadä töwei’shato, tumö ämjumma’da yeiya’jäcä, senö mmaja, töjiiñamo mmaja, tönnacoomo mmaja, tacontomo mmaja, tuduichomo mmaja, töjaadui’chomo mmaja, töweichö jadä’jödöödö ämjumma’da yeiya’jäcä, ñäädä noowanoomadööje eijai’cha na. 27Ñäädä jaadä töweichö wetä öwö jääcäinchädä äntunaanö’jaichojöönö, cuduusa jäcä äämajaichojöönö mmaja, noowanoomadööje eijai’cha na. 28Ämmai amä’se aweiya’jäcä naadö naane’ ¿amootojo täje yeichö ämme’cu’tä’da ca eijai manä awa’de, chääwa’cä yeichö eneedö wetä ajöödatai? 29Dha’da ’quene, tajäntä mma ajänta’jäcä äwwä, acoichajai’cha aweichaame, tameedä enennamo adhenno’jä’jai ñaato yaawä, 30edääje töwä’döancädäiñe: “Määdhä amäädö cönaajäntäi, acoichajai’cha töweichaame;” quee töwä’döancädäiñe. 31Cajiichaana yeiya’jäcä naadö naane’, amoojadä miide mma shootoi töweewänä’taamo yeiya’comjäcä, ¿aaquene mmaja chaana’cajai’cha töweichö jäcä tötö’tajäätödö’jo’da ewäänä’tä ääma’tädööde’ mänsennoto cajiichaana jadä, tooni soto miide’como shootoi jadä? 32Chaana’cajai’cha tötö’ta’jäcä töwö tanoonö anontäjai ña ñanno wwadäädäiñe, amoinche yeichöcoomo dea, äätu’dedööje’da töweicho’como jäcä a’deuwe. 33Mädääje mmaja änwanno, ñäädä tameedä töwwä naadö änsancwajöönö, öwö noowanoomadööje eijai’cha na.

Saayu cadooquejöödö dö’seeno

34“Aashicha saayu töweiye nai. Yaawääne’, dha’cwötöödö wataamea’jäcä, ¿aaquene ma’cwötöömaiye yaawä? 35Nono aca tödööemje’da na, wecaatojo aca tödööemje’da mmaja. Töja’emje mma na yaawä. Eta’sato neta’ñojo; quee cönä’döaacä Jesuuquidiito.

നിലവിൽ തിരഞ്ഞെടുത്തിരിക്കുന്നു:

DUUCA 14: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക