DUUCA 15

Oweeja sadiijangajä dö’seeno

1Tameedä acu’shänä jödaatai i’jummannamo Jesuuquidiito wwadäädä cöne’jumma’to yaawä, conemjönö dönnamo mmaja cöne’jumma’to dea, chäwwä ecammajäätödö eta. 2Yääje yeijäcä ñanno jaadiseeocoomo, judhío owaanomannamo mmaja, Jesuuquidiito jäcä cönenta’me’ca’to; cönä’döa’to:

—Mä’dä conemjönö dönnamo jadä weneene, chääjadäiñe töwääwashinchä mmaja; quee cönä’döa’to.

3Yaawä Jesuuquidiito cöna’deuwöi chäwwäiñe yö’seeno joi. Töwö cönä’döaacä:

4—¿Aaquene töweiye maato änwanno? Dhanwa ecöntomo ijaatoodea soto oweeja weiya’comjäcä, tooni shaadijanga’jäcä, ¿ijimmä ännämä’da ca eijai ñai woi awä, ñäädä shaadijangajä ujiiye töötädö wetä, edantädö wa’cä? 5Töwwä edanta’jäcä na’cwaincha yaawä; tänaawä nannä’a yaawä. 6Tömmai chaca töwä’döa’jäcä töjimmä na’dejjaato, töjaatawoncomo mmaja. Chäwwäiñe nä’döa: “Jaadä adha’cwainchatääcä, yeecönö shaadijaamö’jödö edantä’jödö weijäcä öwwä;” quee nä’döa ñäädä dhanwa. 7Chäänönge yääje wä’döa äwwäiñe, ñäädä dhanwa ta’cwaiñe cönä’ja’döje mmaja caju ñancomo ta’cwaiñe weneeneto dea tooni conemjönö tödöönei wwä tötö’tajäätödö sha’dumincha’jäcä, ijimmä aashicha’como jäcäiñe ta’cwaiñe töweichöcoomo e’jodhe’cä, ñanno tötö’tajäätödööcomo sha’duminchadö tujunnemjöncomo.

Jödaata wääma’jödö dö’seeno

8“Wodi jödaatai amoojadä yeiya’jäcä, tooni yääma’jäcä yaawä, ¿tameedä yeichö wa’cä anuuji’cha ca eijai ñai, tä’sadö semeecancädä mmaja, edantädö wa’cä? 9Töwwä edanta’jäcä töjimmä na’dejjaato yaawä, töjaatawoncomo mmaja. Töwö nä’döa chäwwäiñe: “Jaadä adha’cwainchatääcä, jöödatai wääma’jödö edantä’jödö weijäcä öwwä;” quee nä’döa ñäädä wodi. 10Chäänönge yääje wä’döa äwwäiñe, ñäädä wodi ta’cwaiñe cönä’ja’döje mmaja Wanaadi amoodedö caju ñancomo töwa’cwaincha weneeneto dea tooni conemjönö tödöönei wwä tötö’tajäätödö sha’dumincha’jäcä; quee cönä’döaacä Jesuuquidiito.

Tumö jödaatai acoichanei’jödö dö’seeno

11Edääje Jesuuquidiito cönä’döa’dea:

—Dhanwa aacä iiñacoomo cönä’ja’to. 12Yaawä dhacoono cönä’döaacä tumö wwä: “Jaaja, öwwä änne’cä tameedä yää öwwä töweiyemööje naadö;” quee cönä’döaacä tumö wwä. Yuumö cöneecamoi yaawä tönnacoomo waadäiñe. 13Numa’da mma yää ’jeje ñäädä dhacoono cöneesomaajätöi; amoinche cöntämä anejja jataaca. Iiña tameedä töjöödatai cönaacoichai tömaasuduichadö jäcä. 14Tameedä ijöödatai wataamea’jäcä ämi cönaajäntäi yaawä yää jataawä. Töwö ämi cöiñetuncaacä yaawä. 15Yää jataawono sotoije cönääwaacai yaawä. Ñäädä cönaanontäi yaawä tönaudä’jödö aca, cuushi edai’chäneichomooje. 16Cuushi uduucomo täcu’se töweiye cönä’jaacä yaawä, täwanshinchänei ’je’da yeijäcä. 17Yääje mma yaawä töwö towaadäädä cönä’döi; edääje cöntö’tajä’acä: “Jaaja sotoi jadä’jödöödä chääwanshiñööcomo töwäädetööene weneene, öwö ämi awä wäämataame eetä. 18Jaaja döiña yennacaiyede. Edääje wä’döa’de chäwwä: Jaaja, conemjönö wödööne Wanaadi jäcä, amäädä äjääcä mmaja. 19Ännedööje ätä’täjoojai’cha wa eduuwa; osootoije mmaane cödööcä; quee wä’döa’de jaaja wwä;” quee cöntö’tajä’acä. 20Cönääma’täi yaawä; tumö döiña cönennacai.

“Amoinche yeichö dea yuumö cöneedantäi; wentumje cöneeneaacä. Töwö cöneeca’tömöi tönnedö wwadäädä. Ijöncäcä cönaajäi yaawä shuumadö wetä. 21Iiñedö cönä’döaacä yaawä: “Conemjönö wödööne, Jaaja, Wanaadi jäcä, amäädä äjääcä mmaja. Ännedööje ätä’täjoojai’cha wa eduuwa;” quee cönä’döaacä. 22Yaawä yuumö cönä’döaacä tanoonö wwä: Ma’da’cä, yoomö eichantäcä, aashichaato, miyontätäiye. Shuuditiijai änu’täcä, shaajatui mmaja. 23Jaaca nnedö’cä ejuiñanö’caajä eichantäcä, mamiiñä’catäiye; ta’cwaiñe cääwashinchätäiye, tujuumä. 24Määdhä önnedö yäämaajä wa’cä cönä’jaacä; eduuwa cöjaadäiñe na. Tösaadijange cönä’ja’dea, eduuwa näädantojoi;” quee cönä’döaacä yuumö. Tönwanno töwääwashinchädööcomo cönaajäntoicho yaawä; jooje ta’cwaiñe cönä’ja’to.

25“Yui mmaane cönä’jaacä audaajä aca. Yaawä töwennacaadawä, maa taca ä’döjai töwä’döa’jäcä, shiwo etöödö cöneetaacä, yänwadööcomo mmaja. 26Tumö anoonö cöna’dejjai yaawä: “ ¿Ane’cäämö mädä?” quee cönä’döaacä chäwwä. 27Ñäädä cönä’döaacä: “Adhaacono nä’döi. Yääje yeijäcä jaaca nnedö’cä ejuiñanö’caajä oomo namiiñä’cajoi, tönnedö ääma’da tödöiña yä’dö’jödö weijäcä;” quee cönä’döaacä. 28Yui cönäätömai yaawä; töwoomomö’se’da cönä’jaacä. Yaawä yuumö cöneeja’cai; cönaamonno’jaacä. 29Töwö tumö cöneccujä’acä yaawä: “Numa adhaanonööje weichaame, tooniye awaanontä’jödö ämja’do’jo’da weichaame mmaja, chiiwo nnedö’cä mmädä äntu’da määnene öwwä, jimmä jadäiñe wääwashinchotoojoje. 30Mä’dä ännedö, masuuduichanä que tameedä ajöödatai acoichanei’jödö yä’döa’jäcä mmaane, jaaca nnedö’cä ejuiñanö’caajä jaiñoone mamiiñä’cajoi;” quee cönä’döaacä yui tumö wwä. 31Yääje mma yaawä yuumö cönä’döaacä: “Etaacä dhanwa; amäädä jaadä määnene, aweichöje. Tameedä önnödö ännödööje mmaja na dea. 32Eduuwa chäänönge ta’cwaiñe cääwashinchaato, määdhä adhaacono yäämaajä wa’cä cönä’ja’dö cöjoodö’jocoomo weijäcä. Töwö tösaadijange cönä’jaacä, eduuwa näädantojoi;” quee cönä’döaacä yuumö tönnedö wwä; quee cönä’döaacä Jesuuquidiito.

നിലവിൽ തിരഞ്ഞെടുത്തിരിക്കുന്നു:

DUUCA 15: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക