DUUCA 12

Yääjönö wa’cä töwäänejo weiñä jäcä Jesuuquidiito nowaanoma’jödö

1Yaawä jooje soto cöne’jummaicho yäätä, ime’cu’tädö e’jodhe, töwaatadiimajä’eene. Jesuuquidiito cönaajäntäi yaawä ñanno soto netaadöcoomoje töwa’deuwödö tönoowanoomadö wwäiñe. Töwö cönä’döaacä:

—Äädai’chätääcä jaadiseeo nummannä’cato’como jäcä, yää yääjönö wa’cä töwäänejo weiñä. 2Tameedä tacaademjönö töweecataamöje na. Tameedä etoone’taajä töwääcatu’nacaamöje na dea. 3Yää tööjano’taca aneecammajäätö’jocoomo tameedä tätäämöje nätääcamma’de. Tameedä tacaade’da aneecammajäätö’jocoomo ä’sa waadäi necaata’de.

Ñäädä soto wwäiñe tönontäämö

4“Öwö yääje wä’döa äwwäiñe, änwanno jimmä, adheemannamo mma monnontätäi. Adheema’jejeiñe yäätonno ayöödöjaiñe’da naato. 5Öwö wecamma ñäädä äwwäiñe tönoiñe eijaicho; ñäädääne ñontätääcä, adheema’jejeiñe odo’tadööcomo jadäädä wa’to nwaca adheemajaichoone. Ee, ñäädääne ñontätääcä.

6“ ¿Täje’da jönca tunu’e weneeneto ijaatoodea tadiiñaamo’cä? Aacä jödaata’cä mmädä chääje’jödööcomo. Yääje yeichaame Wanaadi chö’taqueejö’da na chääjäcäiñe. 7Wanaadi dhowaanäcä tameedä aweichöcoomo, äju’jädööcomo jadä’jödöödä töme’cu’tä na chäwwä. Yääje yeijäcä tösaade’da eichäcä; änwanno tujunne’cä maato Wanaadi wwä, jooje tadiiñaamo e’jodhe’cä.

Soto netaadöcoomoje töjöiye’da Jesuuquidiito ecammajäätödö

8“Öwö, Soto nnedö, yääje wä’döa äwwäiñe, ñäädä soto netaadöcoomoje töjöiye’da yeecammajä’nei, öwö mmaja Wanaadi amoodedö netaadöcoomoje töjöiye’da wecamma’dede jaadonooje yeichö. 9Ñäädä soto netaadöcoomoje joome’dänei mmaane, öwö mmaja wijoome’da’dede Wanaadi amoodedö netaadöcoomoje.

10“Ñäädä Soto nnedö jäcoono conemjönö wa’deuwödö, choone’nadiiyö ätäncwanno’jojai ña. Epíiditu Santo jäcoono conemjönö wa’deuwödö mmaane, choone’nadiiyö ätäncwanno’jo’da na’de.

11“Yaawä we’jummatoojo taca adhaadäa’comjäcä, äcamma’jonnamo wwadäädä jeiñe mma, acu’shänä wwadäädä jeiñe mma, äwwäiñe eccujo’to’como jäcä mma mätäncano’tätäi’che, awa’deuto’como jäcä jeiñe mma. 12Epíiditu Santo odhoowanoomaato’de awa’deuto’como jäcä, äwwäiñe eccujo’tojo cu’nädö aca yä’döa’jäcä; quee cönä’döaacä Jesuuquidiito.

Tönsomaaque töwei’she weiñä tönoiñe yeichö

13Yaawä soto do’tacaiñe tooni cöna’deuwöi; cönä’döaacä:

—Owaanomaanei, weichacoono wwä yaatocaajocä ñaa umö ca’semjödö, öwwä äntuiye; quee cönä’döaacä.

14Töwö Jesuuquidiito cönä’döaacä yaawä:

—Adheecamma’joneichomoojönö öwö, dhanwa, äwwäiñe ecammojooneijönö mmaja; quee cönä’döaacä.

15Edääje mmaja Jesuuquidiito cönä’döa’dea:

—Odhoowadäädäiñe eichäcä. Äädai’chätääcä tönsomaaque töwei’she weiña jäcä. Töweichö eneetojoojönö yää tönsomaaque weiñä; quee cönä’döaacä.

16Edääje cönä’döa’dea chäwwäiñe yö’seeno joi:

—Dhanwa tönsomaacato töweiye cönä’jaacä. Töwö ñaatödö jooje cöneejössatai. 17Töwö töwwäädä cöntö’tajä’acä yaawä: “Aaquene edä naatödö ejeedödö wödöötai? Shoomatoojo ’je’da na. 18Edääje wödööa’de. Naatödö ejeedödö ewöötö wamääcaja’de, adai’jä’cä jeene wamääjoiye yaawä. Yää tawä wishooma’de tameedä naatödö ejeedödö, önsomaadö mmaja. 19Edääje chö’tajä’jai wa yaawä: Jooje dämma na önsomaadö, numa weichojooje. Yääje yeijäcä wäädeetanä jäcä mma eijai wa eduuwa, wääwashinchänä jäcä mmaja, wocö enöödö jäcä mmaja, ta’cwaiñe weiyancädä; quee chö’tajä’jai wa yaawä;” quee töwwäädä cöntö’tajä’acä ñäädä tönsomaacato. 20Yääje mma yaawä Wanaadi cönä’döaacä chäwwä: “Aneene’ju’jönö amäädä. Edä coijaichawä määma’de. ¿Änääcö wwonooje eichai’che yaawä mädä onsomaadö’jödö?” quee cönä’döaacä Wanaadi ñäädä tönsomaacato wwä. 21Mädääje töweiye nai ñäädä töwwoodono wensoma’tädö, Wanaadi emjataawä mmaane tönsomaaque’da töwö; quee cönä’döaacä Jesuuquidiito.

Wanaadi tönnacoomo töneedai’chä yeichö

22Yää ’jeje Jesuuquidiito cönä’döa’dea tönoowanoomadö wwäiñe:

—Yääje yeijäcä yääje wä’döa äwwäiñe, eetä aweicho’como jäcä mma mätäncano’tätäi, yää adheewanshiñööcomo ejoodödö jäcä, owoomöcoomo ejoodödö jäcä mmaja. 23Soto weichö na äwanshi e’jodhe’cä; chääjö womö e’jodhe’cä mmaja. 24Jiyau’cwa naatoodö naane’, tönaichöque’da, äämichö’da mmaja, äwanshi shoomadö jäcä etaadawa’cajo’da mmaja, tuduucomo ñeecauto’como ’je’da jadä’jödöödä. Yääje yeichaame Wanaadi töneewashinchä weneeneto ñanno. Änwanno tujunne’cä jeene maato chäwwä, tadiiñaamo e’jodhe’cä jeene. 25¿Änääcö adhantawäiñe tötö’tajäätödö woije mma tooni meetodo annai aatö’nä’jai ñai? 26Mänö’cä mmädä tödööjai’cha maatoodö naane’, ¿ane’que’nei tödööque’jönööto jaiñoone mencano’taato?

27“Chääjödö naadö naane’; töwö töwa’ta, etaadawa’cajo’da töweichaame, wadeecu ane’joi’cha töweichaame mmaja. Yääje wä’döa äwwäiñe, ñäädä cajiichaana Saadomón womö, edä chääjödö wa’cä’da cönä’jaacä iiñataaje yeichö, jooje tönsomaaque yei’chaame töwö Saadomón. 28Jötaadi o’nä tödhau’cwaamöje mma yeichaame Wanaadi woi töniiñataama weneene. Töwaacö’je änwanno owontäjaiñe na, änwanno aneecanö’jöncomoiche. 29Yääje yeijäcä maaquiñu’tätäi’che adheewanshiñööcomo ejoodödö jäcä, owoocödööcomo ejoodödö jäcä mmaja. 30Yää nöngato jäcä töwäätäncano’tä weneeneto ñanno edä nono de’woncomo. Dha’da änwanno; töweiye Oomotoncomo; töwö dhowaanäcä tameedä äwwäiñe a’cato. 31Wanaadi acaajichaanaichomooje tödöödö jäcääne ätäncano’tätääcä. Tameedä yääcomo äwwäiñe nä’tua’dede yaawä.

Caju ña mösooma i’jummadö

32“Tösaade’daane eichäcä, änwanno sootoi, oweeja nönga’como. Wanna’da aweichaameiñe Oomotoncomo acaajichaanaichomooje na. 33Äwwäiñe naadö u’jä’täcä, chääje’jödö manu’täiye yaawä wentumja’como wwäiñe. Ajöödataichomo ewöötö ännötääcä ijumjäje töwä’döemjönööne. Caju ñanoone onsomaadöcoomoje i’jummatääcä, yää ataamejöönö. Iiña tämeenato omoomö’da, cödhaucwä änäu’cwa’da mmaja. 34Tönsomaadö weichö dö’tä tö’tajä’nä töweiye nai.

Ñäädä dhanoonö töwäädai’chooto

35“Töweesomaajä’eedä eichäcä, adhaawadööcomo tämjannäädä mmaja. 36Tädhaajotoncomo yoomo’nnamo töweiye naichodööje eichäcä. Tönwanno yoomo’jai ñaatoodö naane’ jötaana eneenei’jödö tädhaajotoncomo wä’dödö, yaawä dea mma mönaatata a’ducaadö wetä, ta’dejjadööcomo jadä dea mma. 37Ta’cwaiñe eijai ñaato ñanno tädhaajotoncomo wwä edai’chädööja’como woojodööjodööcomo. Chäänönge yääje wä’döa äwwäiñe, töwö chäädhajootoncomo nesoomajä’a’de yaawä. Meesa dö’tä tanoonö najiimajaato’de, töwwä ewanshinchädööcomo wetä. 38Yo’tawääne ye’taame jeiñe mma, awaanajai ye’taame jeiñe mma, edai’chädööje dea töwoojodööja’comjäcä, ta’cwaiñe naato’de yaawä ñanno shootoi. 39Odhoowanääcäiñe tödöötäcä edääje yeichö: Maa edhaajä yeiya’jäcä naadö naane’, dhowaanäcä yeiya’jäcä tämeenato weejödö cu’nädö, öncö’da eijai ña yaawä, tönsomaadö aneememme’jö’da töweichö wetä. 40Chäänönge mmaja änwanno, äädai’chätääcä; Soto nnedö ne’a’de ätö’tajäätödööcomo ’nawä; quee cönä’döaacä Jesuuquidiito.

Dhanoonö chäänöngato, dhanoonö chäänöngemjönö mmaja

41Yääje mma yaawä Peedhodo cönä’döaacä Jesuuquidiito wwä:

—Cajiichaana, ñaa wwonooje ca mädä yö’seeno mecamma’jä’anä, tameedä soto wwoncomooje mmajaane? quee.

42Töwö Cädhaajotoncomo cönä’döaacä yaawä:

—¿Änääcö adhantawäiñe töseedujä’ne nai, tädhaajä anoonöje chäänönge töweiyemö, chu’nädö awä tädhaajä sotoi ewanshinchäneichomooje töweichö wetä? 43Ta’cwaiñe eijai ña ñäädä dhanoonö chäänönge tanontä’jödö tödöödöje tädhaajä wwä töwoojodööja’jäcä. 44Chäänönge yääje wä’döa äwwäiñe, tameedä tönnöjäätödö edhaajäje ñäädä chäädhajä tödööjai ña yaawä. 45Dha’da ’quene edääje ñäädä dhanoonö chö’tajä’a’jäcä: “Yeedhajä e’jai’cha dea na;” quee chö’tajä’a’jäcä, tädhaajä sotoi aiju’jätöödöcoomo yaajänta’jäcä, ñanno dhanwaacomo, wodiiñamo mmaja, töweewodoichadö yaajänta’jäcä, töwä’dacuudu mmaja, 46töwö chäädhajä e’jai ña yaawä cu’nai’cha, chäwwä yoomocöödö ’nawä. Ñäädä chäädhajä nimaamincha’de yaawä jooje, tanoonö conemjönö tödöödö töweiye naichöje.

47“Ñäädä dhanoonö, tädhaajä waanontä’jödö towaanäcä yeichaame ännöjöönö, jooje nätä’maminchaja’de töwaataiju’jojootödö que. 48Ñäädä towaanäcä’da yeiyancädä conemjönö tödöönei’jödö mmaane äächädä töwaataiju’jojootödö que nätä’maminchaja’de. Ñäädä joojato chäwwono wä’tu’jödö, jooje’cä u’jai ña. Ñäädä jooje yö’tono ñängajä wwä jooje’cä ne’ca’aato’de.

Töjääcäinchädä wä’tu’de’tänä jäcä Jesuuquidiito necammajäätö’jödö

49“Wa’to nöngato emjannä we’ne edä nono de’cäi. Eduuwaane wätuudinchänääjeene yei’she wa. 50Töweiye na wautisaaje wä’döjootojo, yää wäntunaanö’tojo tödheetuncaamö. Jooje cone’da wäänene yeeja’do’tojo cu’nädö aca yä’dödö wa’cä. 51¿Täncanoode’da weiñä ene’e ca edä nono de’cäi weejö’jödö mecaanö’ato? Ng’jn, soto encödööeiñeene we’ne. 52Eduuwa naadö jonno ñanno wä’jimmä’tädö dea ijaatoodea’como nä’sancwaato’de, äätu’dedööje töweichöcoomo wetä. Ñanno aaduwaawo’como aaco’como tu’dedööje naato’de, aaco’como aaduwaawo’como tu’dedööje daja. 53Yaawä anejja dhanwa tönnedö nichu’de’ta’de. Iiñedö tumö nichu’de’ta’dede. Yeenö mmaja tönnedö acä nä’tu’de’taato’de. Iiñedö senö acä nä’tu’de’taato’dede. Yaiñe’nei töja’se nichu’de’ta’de; ija’se töwaiñe’nei acä nä’tu’de’taato’dede; quee cönä’döaacä Jesuuquidiito.

Weiñä cu’tädö ene’jutuudu

54Edääje mmaja Jesuuquidiito cönä’döa’dea soto wwäiñe:

—Shii womontojo dö’se ca’dutu weja’cadö eneea’jäcä äwwäiñe, conoojo wiiñatoojo mene’ju’ato yaawä. 55Shii weja’catoojo suda’wawonno jejeichä wä’dödaawä, ta’ne yeichojo daja töneene’ju’e määnetääne; ta’ne weneene yaawä. 56Yääjönö wa’co’como wäänejoodö änwanno. Änwanno weiñä töneene’ju’e määnetääne, caju weichö eneedö que, nono weichö eneedö que mmaja. ¿Aaquene eduuwa weiñä naadö cu’nädö aneene’jutu’da maato?

Töwäätäuwö’se weiñä jäcä Jesuuquidiito nowaanoma’jödö

57“ ¿Ane’que’nei änwanno dea chäänöngato que ecooneca’da määnetääne? 58Äjääcä cone’da anejja weiya’jäcä, äcamma’jonei wwadäädä adhaadäa’jäcä yaawä, yaawä dea mma adheeconeecatääcä’de dhacä, ääma tai äätädaawäiñe dea mma, äcamma’jonei wwä mma ayu’tu’no yaawä. Ñäädä äcamma’jonei ayuutujai ña yaawä jedeesoje dönei wwä; jedeesoje ayöödöaato’de yaawä. 59Chäänönge yääje wä’döa äwwä, jedeeso ewöötö tacanno eja’ca’da ma’de tameedä ejeemadö wa’cä äwwä; quee cönä’döaacä Jesuuquidiito.

നിലവിൽ തിരഞ്ഞെടുത്തിരിക്കുന്നു:

DUUCA 12: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക