DUUCA 11

Wanaadi wwä wa’deunä jäcä Jesuuquidiito nowaanoma’jödö

1Yääje mma yaawä Jesuuquidiito Wanaadi wwä cöna’deuwacä. Ya’deuwödö yä’ca’jäcä tooni ñoowanoomadö cönä’döaacä chäwwä:

—Cajiichaana, ñaa owaanomaacä Wanaadi wwä wa’deunä jäcä, Juan tönoowanoomadö cönoowanoomaichodööje mmaja; quee.

2Jesuuquidiito cönä’döaacä chäwwäiñe:

—Awa’deuwödaawäiñe edääje caichäcä’de:

Jaaja caju ñano,

Töwaanadiiyöcoomoje adhe’tä’ña’to soto;

töcaajichaanaichomooje ayöödö’ña’to.

Ämjummadö woije nödö’ña’to edä nono de’woncomo, caju ñancomo tönnöe weneenetoodöje mmaja.

3Ñaa ewanshiñö änu’cä edä anootoi’chädö awä.

4Ñaa cone’nadiiyö encwanno’jocä, ñaa mmaja tameedä töjääcä conemjönö tödöödö tönencwanno’jo ñaa weneenedööje mmaja.

Ñaa mäiñunaacajoi’che; tösancwajoone ñaa sancwajoocä conemjönö jonno; quee caichäcä’de; quee cönä’döaaca Jesuuquidiito.

5Edääje mmaja cönä’döa’dea chäwwäiñe:

—Edääje yeiya’jäcä naadö naane’: Anejja yo’tawääne töweichacoono döiña iicha’jäcä uu e’ca’e, edääje ä’döjai ñaadö naane’ yaawäne’: “Aaduwaawä ecauwö’jödö uu änne’cä. 6Weichacoono ömmai chaca nä’döi, aneiñajaano’jödö. Chääwanshiñö tödööemö ’je’da na öwwä;” quee ä’döjai ñaadö naane’ töweichacoono wwä. 7Yaawä ñäädä tömmai chacaano eccujä’jai ñaadö naane’: “Canaaquiimai. Tajoijo önnata’tadö na. Önnacoomo’cä wönö’näje naato dea. Wä’tä’se’da wa äwwä utuudu wetä;” quee. 8Edääje wä’döa äwwäiñe, ñäädä töweichacoonoje yeichö jäcäinchädä ä’tä’da töweichaame, wä’caaje’da yaatemeecödö weijäcääne töwö ä’täjai ña, imjummadö wa’cä chäwwä u’e. 9Yääje yeijäcä yääje wä’döa äwwäiñe: Ane’ca’täcä, äwwäiñe Wanaadi äntuiye; anuujichääcä, maneedantätäiye; a’dejjatääcä, mönaatata äwwäiñe ata’deucaiye. 10Ñäädä e’ca’nei wwä töwä’tue töweiye nai, ujiiñei wwä töwäädantojo, a’dejjanei wwä mönaatata töwaata’duca.

11“ ¿Änääcö adhantawäiñe täju u’jai ñai tönnedö wwä, tudu e’catäädawä? Na’cwacaano jeiñe mma e’ca’a’jäcä chäwwä, ¿änääcö äcääyu äntuduude’ ? 12I’moi jeiñe mma e’ca’a’jäcä, ¿änääcö mönäätä äntuduude’ ? 13Änwanno cone’da aweichaameiñe odhoowanääcäiñe aashichaato utuudu ännacontoncomo wwä. Töwaacö’je Oomontoncomo caju ñano Epíiditu Santo u’jai ña töwwä e’ca’nei wwä; quee cönä’döaacä Jesuuquidiito.

Odo’sha ’je Jesuuquidiito e’tä’jödö

14Yääje mma yaawä dhanwa acanno Jesuuquidiito odo’sha ana’deujojoojönö cömja’canö’jaacä. Tötaacanno odo’sha weja’ca’jäcä ñäädä ta’deudemjönö’jödö cöna’deutai. Ñanno soto cönääcatoncaicho yaawä. 15Anejjacoomo ’quene cönä’döa’to:

—Mä’dä dhanwa odo’shancomo tömja’canö’jo weneene Weesewú jäduudu que, ñäädä odo’sha edhaajotoncomo; quee cönä’döa’to.

16Anejjacoomo Jesuuquidiito yuunacaadöje ene’ju’tojo cönnöja’to chäwwä, caju ñanooje töwäänejootojooje. 17Töwö dhowaanäcä cönä’jaacä chö’tajäätödööcomo: cönä’döaacä chäwwäiñe:

—Yää jataawoncomo dea wewäänä’ta’comjäcä, töwaatame mma ataamejai ñaato. Yää maa tawoncomo dea yä’tu’de’ta’comjäcä, ataamejai mmaja. 18Mädääje mmaja Caajuushawa, töwwäädä yä’tu’de’ta’jäcä, ¿aaquene mmaja numa jäduuje eichö deeade’ ? Öwö yääje wä’döa äwwäiñe Weesewú jäduudu que odo’shancomo tömja’canö’jo ye’tädö weijäcä äwwäiñe. 19¿Caajuushawa jäduudu que ca odo’sha ija’canö’jodööcomo mecaanö’ato öwwä? Yääje yeiya’jäcä, ¿änääcö jäduudu que tömja’canö’jo weneeneto osootoichomo änwanno? Yääje yeijäcä osootoichomo dea nene’ju’jaato chäänönge’da aweichöcoomo. 20Öwö mmaane Wanaadi jäduudu que odo’sha tömja’canö’jo wäänene. Yääje yeijäcä odhoowanääcäiñe eijai ña Wanaadi acaajichaanaichomooje yä’dötoojoje yeicho.

21“Dhanwa jäduujato wwä töwaichaque tömmai edai’cha’jäcä, tönsomaadö ememme’jojai’cha na yaawä. 22Yaawääne’ jäduujato’cä jaiñoone yöiña ye’a’a’jäcä, ñäädä wwä näto’jodheinchaja yaawä. Ñäädä tameedä yaichadö que nenwajiiñajä’a yaawä, yää chäädha’me töweichö jäduujato wa’cä chö’tajä’eetö’jödö. Iiñöjäätödö nadääa yaawä töjimmä wwäiñe u’jätöödö wetä.

23“Ñäädä öwö jaadonoojönö, tu’de’tänei ñäädä. Ñäädä jaadä anaamu’jönö, töja’e mma nöja’a.

Odo’sha wennacaadö

24“Soto acanno odo’sha weja’ca’jäcä töwö näämannä’a nono sedejjato de’cäcä, töweejata’totoojo ujiiyancädä; aneedantä’daane. Aneedantä’da töweijäcä edääje nichö’tajä’a yaawä: “Iiña mmaja yennacaiyede; weeja’ca’jödö taca mmaja yoomomöiye;” quee. 25Yaawä iiña mmaja töwä’döa’jäcä täwöötö’jödö nedanta maa töseemeeca ñängajä eijai ñaadöje, töcoonecaajä’e mmaja. 26Töwö nöta yaawä töjimmä wetäiñe. Aacä amoojato odo’shancomo nene’aato yaawä, cone’daiñe’cä jeene tönwanno. Yaawä tönwanno nomongaato ñäädä soto aca, töweejata’tädööcomo wetä. Yaawä ñäädä soto wecoone’maajä na awa’de töwei’jödö e’jodhe’cä jeene; quee cönä’döaacä Jesuuquidiito.

Ñanno ta’cwaiñe töweiyaamo

27Yääje Jesuuquidiito wä’dötaame, tooni wodi ñanno soto do’tacaiñe töcä’de cöna’deuwöi; cönä’döaacä chäwwä:

—Ta’cwaiñe eijai ña ñäädä wodi adhennuichanei’jödö, ñäädä imaanatöödö mennedö; quee cönä’döaacä.

28Jesuuquidiito cönä’döaacä yaawä:

—Ñannoone ta’cwaiñe eijai ñaato, Wanaadi a’deddu etannamo, tödönnamo mmaja; quee cönä’döaacä.

Soto conemjöncomo ene’ju’tojo tönnöjo yeichöcoomo

29Jooje soto we’jumma’comjäcä, Jesuuquidiito cönaajäntäi töwa’deuwödö; cönä’döaacä:

—Cone’da naato canno soto eduuwa naatoodö. Ene’ju’tojo tönnöjo weneeneto. Yääje yeichaame aneene’da naato’de. Joná wei’jödö mmaane nichö’tammecö’ña’to, ñäädä Wanaadi wa’deuwödö ecammanei’jödö. 30Joná cönä’jaacä chu’tädööje Niiniwe ñancomo wwä. Mädääje mmaja Soto nnedö chu’tädööje na’de canno soto wwäiñe. 31Yaawä wätämmencajootojo anooto awä, canno soto eduuwa naatoodö wätääcamma’jojoodawäiñe, ñäädä wodi, shii weja’catoojo suda’wawoono cajiichaana, conemjöncomooje ne’taato’de. Ñäädä wodi amoinchenno cöneejä tösejjeque Saadomón wa’deuwödö eta. Saadomón e’jodhaato’cä jaiñoone eetä na eduuwa. 32Yaawä wätämmencajootojo anooto awä mmaja, Niiniwe ñancomo mmaja conemjöncomooje ne’taato’dede canno soto eduuwa naatoodö, yäätäcamma’jojoodawäiñe. Ñanno Niiniwe ñancomo tötö’tajäätödööcomo cönsa’duminchaicho Joná necammajäätödö etaadö’jo. Joná e’jodhaato’cä jaiñoone eetä na eduuwa.

Soto dhawaadö

33“Tödhaawadö tönemjannädö aneetone’tä’da weiñä nai, wöwa aca aneewötö’tä’da mmaja. Dha’täi ye’wääne tödöödö, tameedä iiñancomo womoomödö wwä tawaane eiye. 34Soto enuudu na yeichö dhawaadöje. Aashicha adheenudu yeichawä aweijotä yaawä. Yaawääne’ adheenudu cone’da yeiya’jäcä, tööjano’taca ma amäädä yaawä. 35Odhoowoinchadä’da eichä, adhaawadööjato’jödö änweijo’da’da mma ei’che. 36Tameedä aweichö tawaanato aca yeiya’jäcä, she’caasa tööjato ’je’da aweiya’jäcä mmaja, tawaanato aca ma’de yaawä, adhaawa niweijodö awä weiñä naichöje.

Jesuuquidiito wwä judhío owaanomannamo ijiiyemeecö’jödö

37Yääje ya’deuwö’jeje jaadiseeo tä’saca Jesuuquidiito cöna’dejjai, ewanshinchädö wetä. Jesuuquidiito cönoomomöi yaawä; meesa dö’tä cönaatajiimai. 38Ñäädä jaadiseeo cone’da cönä’döjoi yaawä, töwääwashinchääje tamäädö anaamoicha’da Jesuuquidiito eneea’jäcä. 39Yaawä Cädhaajotoncomo Jesuuquidiito cönä’döaacä chäwwä:

—Änwanno jaadiseeo ye’wä mma aashicha maato, incha’cäcä mma jadaaji atööäjä töweiye naichöje; aweichöcoomo mmaane tämeeneiñe, chäänönge’da mmaja. 40¿Odhoowanääcäiñe’da ca’ nai ñäädä soto ejö tödöönei’jödö dea yo’tadö tödöönei’jödööje mmaja yeichö? 41Wanaadi jummadö queene änu’täcä’de yää äwwäiñe naadö; yaawä tameedä amoije’da na’de äwwäiñe.

42“Wentumje maato’de änwanno jaadiseeo. Änwanno Wanaadi wwonooje tunu’e määnetääne anaatödööcomo ejeedödö, yää jomi, wishu mmaja, tameedä anejja’cä mmädä mmaja, chäänönge weiñä, Wanaadi jummadö mmaja, anencano’tä’da aweichaameiñe. Mädääne tödööjai maato, mänööcomo tödöödö ane’nomja’da dea aweichaameiñe.

43“Wentumje maato’de änwanno jaadiseeo. Änwanno täneejuca’como a’täi ye’wä awei’sheiñe määnetääne we’jummanaawä. Tönoiñe adheene’madööcomo que jata antawä soto wwäiñe awaata’dejjajoodöcoomo awaacö’comje mmaja.

44“Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno maato äwa äänejöönö töweiye naichöje, yää ye’cäcä soto töwäämannä’e töweiye naichodö, towaanäcäiñe’da yeiyancädä; quee cönä’döaacä Jesuuquidiito.

45Yaawä owaanomannamo jimmä cönä’döaacä:

—Owaanomaanei, mädääje awa’deuwödö que ñaa mmaja cone’da ñaa mödööja dea; quee cönä’döaacä.

46Jesuuquidiito cönä’döaacä:

—Änwanno mmaja, owaanomannamo, wentumje maato’dede. Änwanno soto wwäiñe ä’döque’jönööto tönnöjo määnetääne, tamiiñato adoojodö töweiye naichöje, i’wa’tädööcomo jäcä chö’tajäätö’da aweiyancädäiñe.

47“Wentumje maato’de änwanno. Änwanno tönnöe määnetääne äwa, Wanaadi wa’deuwödö ecammannamo’jödö ewaadöcoomo, ñanno adhaadai’choncomo canaadöje cönä’jajoichodö. 48Mädääje määne’ju’jaato adhaadai’choncomo nödö’jocoomo awaacö’comje yeichö. Tönwanno cömjajoicho; änwanno töja’a’como ewaadöcoomo mödööato.

49“Yääje yeijäcä Wanaadi tösejjeque töweichö woije yääje cönä’döaacä: “Wa’deuwödö ecammannamo, anejjacoomo yaanonö mmaja, wanaanontaato’de yöiñaiñe. Dhantai nöja’aato’de; dhantai ’chene nimaaminchaato’de;” quee Wanaadi cönä’döaacä. 50Canno soto eduuwa naatoodö nätä’maminchajaato’de tameedä Wanaadi wa’deuwödö ecammannamo töjaajo’jocoomo weijäcä, ñanno nono wamoodeta’jödö jonnoto’jödöödä imjajo’jocoomo, 51Aweede ema’jödö jonnoto’jödöödä Saacadía ema’jödö jona tödööene, ñäädä saaquidiijiisiyo dötoojo ncadheedä cöneemaichodö Wanaadi weichojo tawä. Chäänönge yääje wä’döa, canno soto eduuwa naatoodö nätä’maminchajaato’de tameedä yää jo’tädööje.

52“Wentumje maato’de änwanno owaanomannamo. Änwanno soto woowanoomato’comoojato’jödö töncone’ma määnetääne, yaawi che soto enwajiiñadö töweiye naichöje. Änwanno aashicha jeene oowanooma’da, ñanno töwoowanooma’sa’como onoowanoomajo’da mmaja; quee cönä’döaacä Jesuuquidiito.

53Yääje ya’deuwö’jeje, ñanno judhío owaanomannamo, jaadiseeocoomo mmaja cönäätömaicho jooje. Ecamma’jojäätödö que cönaaquiima’to yaawä. 54Tönwanno cone’da a’deudeme’jo’se cönä’ja’to, yää ’jeje chääjäcä cone’da töwa’deuwödööcomo wetä.

നിലവിൽ തിരഞ്ഞെടുത്തിരിക്കുന്നു:

DUUCA 11: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക