Afaka amin'ny fanandevozana rehetra ianao

Isan-taona dia feno sôkôla maro isan-karazany ny tsena rehetra rehefa amin’ny fotoanan’ny Paska... izay mampametra-panontaniana lehibe. Fetin'ny sôkôla ve ny Paska? Mazava ho azy fa tsia ny valiny.

Ny Paska mazava ho azy dia mampahatsiahy antsika fa Jesosy dia maty sy nitsangana indray, ary nandresy ny fahafatesana sy ny heriny rehetra Izy! Ny Paska, na ny Andro Fitsanganana amin’ny maty, no ivon’ny hafatry ny Filazantsara: « Kristy Jesosy no efa maty, eny, sady nitsangana tamin'ny maty koa ka mitoetra eo amin'ny tanana ankavanan'Andriamanitra ary mifona ho antsika. » (Romana 8 : 34)

Ny Paska voalohany, “Pessah”, dia voalaza ao amin’ny Testamenta taloha ao amin’ny Deoteronomia 16 : 1 sy 3 : « Tandremo ny volana Abiba, ka ataovy ny Paskan'i Jehovah Andriamanitrao fa tamin'ny volana Abiba no nitondran'i Jehovah Andriamanitrao anao nivoaka avy tany Egypta tamin'ny alina. [...] mba hotsarovanao amin'ny andro rehetra hiainanao ny andro izay nivoahanao avy tany amin'ny tany Egypta. »

Noho izany, ny Paska voalohany dia nankalaza ny andro nanafahan’ny Andriamanitry ny Isiraely ny vahoakany tamin’ny fanandevozana. Nivoaka avy tany Egypta ny vahoakan’Andriamanitra. Tonga ihany ny Fanafahana...taorian'ny fanandevozana 400 taona!

Toy izany koa, ny fahafatesana sy ny fitsanganan’I Jesosy tamin’ny maty no manafaka antsika amin’ny hery sy ny vesatry ny fahotantsika! Ny sorona nataony dia mamela antsika “handao ny Egypta”, tanin’ny fanandevozana. Izany no fanafahana ho an’izay rehetra tonga zanak’Andriamanitra! Fandresena ho anao koa ny fankalazana ity Paska ity!

Tsy fetin’ny sôkôla ny Paska... fa fankalazana ny fandresen’Andriamanitra, fanafahana sy ny fanavotana anao amin’ny ran’I Jesosy Zanany! Ndao hizara izao fankalazana sy fifaliana izao amin'ny namana sy ny fianakaviana anio!!

Misaotra fa misy ianao!

Éric Célérier

Fanamarihana: Ny lahatsoratra amin'ity vakiteny ity dia avy amin'ny mailaka isan'andro “Fahagagana isan’andro”. Raha te hahazo mailaka isan'andro ianao dia manasa anao hisoratra anarana ao amin'ny Fahagagana isan’andro.