Manokatra ny tanany ho anao I Jesosy

Ny Paska dia mampahatsiahy antsika ny ahafahantsika mifandray tsara amin’I Jesosy. Ny fahafatesany sy ny fitsanganany tamin’ny maty dia mampiseho amintsika ny fitiavany antsika, na inona na inona toe-javatra iainantsika! Niaritra ny zava-drehetra ho antsika Izy, araka ity andinin-teny ao amin’ny Baiboly ity:

« … tsy nanana endrika na fahatsaran-tarehy Izy; Ary raha nijery Azy isika, dia tsy nisy hatsaran-tarehy haniriantsika Azy. Natao tsinontsinona sy nolavin'ny olona Izy; lehilahy ory sady zatra ny fahoriana, Ary tahaka izay tsy tian'ny olon-kojerena akory Izy; natao tsinontsinona Izy ka tsy mba nahoantsika. Nitondra ny aretintsika tokoa Izy sady nivesatra ny fahoriantsika; kanjo isika kosa nanao azy ho nokapohina sy nasian'Andriamanitra ary nampahorina..» (jereo Isaia 53 : 2 - 4)

Inona no mampahory anao izao? Fanalam-baraka, fanilikilihana, fankahalana, manirery, fanaintainana ara-batana sa ara-pihetseham-po?

Jesosy mahatsapa ary mahafantatra tsara izay mety hiainanao, satria Izy efa nizaka ny mangidy indrindra teo amin’ny Hazofijaliana:

Nolavina sy nohamavoina Izy, Ilay nanao fahagagana.

Nokapohin’Andriamanitra Izy, nampahorina, na dia masina tanteraka aza.

Nalaim-baraka Izy, nororaina Izy, ilay Zanak’Andriamanitra.

Nokapohina Izy, nokaravasina, Izy ilay tsy nanao ratsy na ny kely aza.

Noesoina Izy, notevatevaina, nefa tsy mba niaro tena akory.

Niaritra irery Izy, alavitra an’ireo rehetra tiany

Nilaozan’ny rehetra Izy.

Eny, teo amin’ny havoana antsoina hoe Golgota no nitondran’I Jesosy ny ZAVATRA REHETRA. Nankatò Izy, hatramin’ny nahafatesany teo amin’ny hazo fijaliana (jereo Filipiana 2 : 8). Ny sorona nataony dia mamela antsika ankehitriny ho voavonjy amin’ny fahotantsika, ho sitrana amin’ny aretintsika ary hihavana amin’ny Ray. Hoy ny Isaia 53 : 5 : « Nefa Izy dia voalefona noho ny fahadisoantsika sy notorotoroina noho ny helotsika, ny fampijaliana nahazoantsika fihavanana no namelezana Azy; ary ny dian-kapoka taminy no nahasitranana antsika. »

Maka tahaka an’I Jesosy ho modely, ny fahoriany sy ny Hazofijaliany no mazàna lalana sarotra indrindra lalovan’ny kristianina. Saingy aza adino fa io ihany koa no lalam-pandresena sy fitsanganan’ny tena amin’ny maty… Jesosy efa nisolo toerana ho anao mba tsy hahatsiaro ho irery intsony ianao, eny fa na dia anatin’ny mangidy indrindra aza.

Anio, tsarovy fa manokatra ny tanany ho anao Izy mba hitia, hampionona, hampahery, hampitony ary hanasitrana anao…

Mirary tontolo andro mahafinaritra ho anao, feno ny Fiadanany : Jesosy efa nahatanteraka ny zavatra rehetra, Velona Izy!

Misaotra fa misy ianao!

Éric Célérier