Hoy Jesosy aminao hoe: Manaraha Ahy!Santionany

Andro faha-3 : Fiainam-baovao no omena anao!

Manahoana ianao ry namako,

Ny Andriamanitsika dia tena tsara sady marina tokoa. Tonga lafatra amin’ny zava-drehetra Izy! Misy fotoana aho manadino izany, mihevitra fa afaka manao izay tiako atao rehetra ary tsy hizaka ny vokatr’izany. Adinoko fa efa fiainana vaovao no iarahako amin’i Jesosy , misy fitsipika sy lalàna tsy mitovy amin’ireo nandrafitra ny fiainako taloha.

Ry namako, efa nisy fotoana ve ianao manadino fa ny fiainana omen’i Jesosy anao dia efa fiainana vaovao ? Fiainana hafa tanteraka tamin’ilay talohan’ny nisafidiananao hanaraka an’i Jesosy.

« Ny fanarahana an’i Jesosy » dia mahitsy sy marina! Ao amin’ny Matio 4 :17 Jesosy dia manasa antsika hibebaka manao hoe: « Mibebaha ianareo, fa efa akaiky ny fanjakan'ny lanitra.»

Rehefa miteny anao Jesosy hoe «Manaraha ahy» dia te hiteny aminao Izy hoe:

-Ovao ny lalànao!

-Ovao ny fomba fisainanao!

-Mialà amin’ny fahotana!

-Aza afangaro ny fanenenana sy ny fibebahana!

«Ny fanarahana an’i Jesosy» dia fanekena ny hamboarina mandrakariva hitovy amin’i Jesosy.Ny fiainana vaovao atolotr’Andriamanitra dia fiovana tsy tapaka , lalina ary hita maso.

Manasa anao aho hiaraka hivavaka amiko : «Ry Jesosy Tompo ô, eo amin’ny seza fiandrianana Hianao, manjaka amin’ny voninahitra. Mba ambarao amiko izay tokony hovana eo amin'ny fiainako. Eny, ampahirato ny masoko ny amin’izay tsy sitrakao. Te hiaina ny fiainana vaovao nomaninao ho ahy aho! Te hiaina fiainam-pibebahana aho hahafahako miditra sy miaina ao amin’ny Fanjakanao. Misaotra noho ny fiantranao. Misaotra noho ny faharetanao. Misaotra noho ny Fanampianao sarobidy. Amen»

Andao hitia ny olona mandra-panontaniany tena hoe nahoana, ary indrindra rehefa avy eo.