Miaina Fiovana: Mandritry ny KrismasySantionany

Finoana

Mora amintsika ny mety ho tratran’ny enjikenjika sy hazakazaka mandritra ny fotoanan’ny krismasy hany ka adinontsika hoe nahoana moa isika no mankalaza azy. Na dia maniry mafy ny ho tonga fahazavana ho an’ny manodidina antsika aza isika dia sarotra ihany indraindray ny milanja ireo vesatra izay tsy maintsy zakaina amin’io vanim-potoana io. Mba tsy hanohizantsika hizaka ny ahiahy, hatezerana sy ny fankahalana lava izao dia manampy antsika hiaina amin’ny fomba hafa an’izao vanim-potoanan’ny fety izao ny finoana an’i Jesoa.

Ao amin’ny epistily ho an’ny Efesiana, dia mampahafantatra antsika ny Apostoly Paoly fa afaka mandrafitra ny fomba fijerintsika ny finoana tamin’izy nandrisika antsika handray ireo fiadin’Andriamanitra isan’andro. Notanisainy tao ireo karazana fiadin’Andriamanitra dia: ny fahamarinana ho sikina eo amin’ny valahana, ny rariny ho fiarovan-tratra, ny fahavononam-panahy hitory ny filazantsara ho kiraro, ny finoana ho ampinga, ny famonjena ho fiarovan-doha ary ny sabatry ny fanahy, izay tenin’Andriamanitra izany. Ireo singa tsirairay ireo dia natao ampahatsiahy antsika ny hery sy ny fiarovana izay ananantsika ao amin’i Kristy.

Mahagaga fa ny fitaovam-piadiana izay nampian’i Paoly fanazavana misimisy kokoa dia ny finoana ho ampinga. Hoy izy hoe manana hery “hamono ireo zana-tsipika mirehitra rehetra izay alefan’ilay ratsy” izy io. Mijanona kely mihitsy aloha maka sary an-tsaina an’izany voalaza izany. Misy zana-tsipika mirehitra mivantana mankany aminao ary rehefa manetsika ny ampinganao fotsiny ianao, dia tsy manan-kery handratra anao intsony izy io. Fitaovam-piadiana mahery hiadiana amin’ireo teti-dratsin’ilay fahavalo ny finoantsika!

Misy fotoana diso hevitra isika ny amin’ny hoe iza marina no fahavalontsika. Mety ho endrikendrehantsika amin’izany ilay mpiara-miantsena tsy mahalala fomba amintsika iny, na ny mpampiasa antsika izay nandroaka antsika taloha kelin’ny krismasy mihitsy, na ihany koa ilay havantsika tsy mitsahatra ny manakiana antsika iny mihitsy. Fa tsy ireo olona manodidina antsika ireo nefa no fahavalontsika. Ny tena fahavalontsika dia ilay devoly izay mandehandeha tahaka ny liona mierona izay mitady hangalatra ny hafalianao, hamono ny fanantenanao ary handrava ny fiadananao. Fahamarinana izay tena mampivarahontsana sy tokony heverintsika tsara, saingy tsy tokony hampatahotra antsika nefa izany. Ny Andriamanintsika dia mahery lavitra noho izay mety hiseho hanafika antsika.

Na dia hoe fanomezana avy amin’Andriamanitra aza ireo fitaovam-piadiana ireo dia mila malina tsara isika rehefa manao azy. Afaka atao amin’ny fomba tsotra toa izao vavaka isan’andro izao izany:

“Andriamanitra o, manaiky aho fa ao anatin’ny ady ara-panahy ary mahatoky ny fiarovanao aho. Misikina ny fahamarinana amin’ny valahako aho; ampio aho hiaina sy hilaza ny marina irery ihany. Mitafy ny rariny ho fiarovan-tratra aho; arovy ny foko ary ampio aho hahay handray ny fitarihanao. Manao kiraro eny an-tongotro ny fahavononan-kitory ny Filazantsaran’ny fampihavanana aho; ampio aho hanambara amin’ny hafa ny mikasika Anao ary hitondra fiadanana any amin’izay tany rehetra alehako. Raisiko ny ampingan’ny finoana; ampio aho hatoky anao ary arovy amin’ny fitafihan’ny fahavalo aho. Raisiko ny famonjena ho fiarovan-doha; arovy ny eritreritro ary ampio aho hisaintsaina izay zavatra tsara irery ihany. Raisiko ny sabatry ny fanahy; ampio aho hahatsiaro ny Soratra Masina ary ampiasa azy hiarovako ny tenako sy ny hafa. Amen!”

Amin’izao krismasy izao, dia ‘ndao hiambina tsara manoloana ny fanafihan’ilay fahavalo. Tsarovy fa tsy ireo olona izay manodidina anao no iadivanao. Mifantoa amin’ilay fahamarinana hoe tian’Andriamanitra fatratra ianao ka tsy hahavoa anao izay fanafintohinana mikendry anao. Ataovy izay azonao atao hitiavana an’ireo olona izay manodidina anao, indrindra indrindra ireo olona izay sarotindrotiny satria tsy hainao izay alahelo mety zakainy any. Hanampy anao amin’izany rehetra izany ny fitondrana ny fiadin’Andriamanitra isan’andro.

Alohan’ny andehananao miantsena, raiso ny fiadin’Andriamanitra. Alohan’ny iadinao hevitra, raiso ny fiadin’Andriamanitra. Alohan’ny hamonjenao fivoriam-pianakaviana, raiso ny fiadin’Andriamanitra. Alohan’ny ilavonao lefona na ny fahaverezan’ny faharetanao na hamalianao an-katezerana, dia raiso aloha ny fiadin’Andriamanitra. Afaka mahatoky tsara ny fiadin’Andriamanitra sy ny herin’ny finoana isika. Rehefa mahatoky amin’ny fitadiavana an’Andriamanitra hampahery antsika isika, dia mahatoky miaro antsika Izy.