Miaina Fiovana: Mandritry ny KrismasySantionany

Fanantenana

Amin’ny maha-kristiana antsika dia mankalaza ny krismasy isika ho fahatsiarovana ny fanantenantsika ao amin’i Jesoa. Koa nahoana ary no mora very fanantenana kely isika rehefa amin’ny fotoana toa izao? Mety hoe satria tsy mbola azontsika tsara ny tena dikan’ny hoe Fanantenana ary avy aiza marina izy io.

Ny Jeremia 29:11 no andinin-tSoratra Masina malaza indrindra mikasika ny Fanantenana. Hoy izy hoe: “‘‭‭Fa Izaho mahalala ny hevitra iheverako anareo, hoy Jehovah, dia hevitra hahatonga fiadanana, fa tsy loza, mba hanome anareo fanantenana ny amin’ny farany.’”

Tsy hoe teny mahafinaritra apetaka amin’ny kaopy fotsiny io; fa Teny Fikasana avy amin’Andriamanitra izay natao hofikirintsika rehefa mahatsiaro very fanantenana isika. Na dia hoe teny natolotra ho an’ny vahoaka Israely tamin’izy ireo babon’ny Babyloniana aza izy io, dia mbola tsy niova Andriamanitra na tamin’izany fotoana izany ary na dia amin’izao ankehitriny izao aza. Ary satria tsy miova ny toetran’Andriamanitra, dia afaka mahatoky isika fa mbola marina amintsika ny Teny Fikasany amin’izao vanim-potoana iainantsika izao.

Raha ny marina dia raha tena mitady azy ireo tokoa isika dia hahita Teny Fikasan’Andriamanitra maro ho antsika ao amin’ny Testamenta Taloha. Teo amin’ny tantaran’ny olony dia maneho antsika ombieny ombieny Andriamanitra ny amin’ny mombamomba Azy ary manome porofo ho antsika fa azo itokisana tsara Izy.

Iray amin’ireo Teny Fikasan’Andriamanitra voalohany dia hita ao amin’ny Genesisy tamin’Andriamanitra nilaza fa hitahy ny firenena rehetra amin’ny alalan’i Abrahama Izy. Milaza amintsika eto Andriamanitra fa ny Mesia dia ho taranak’i Abrahama ary hamonjy ny olombelona amin’ny fahotany Izy–tsy ny vahoaka Jiosy irery ihany, fa izay rehetra hino Azy. Avy eo dia mahita isika ao amin’ny Testamenta Vaovao ny porofo fa marina amin’ny Teniny tokoa Andriamanitra. Ny bokin’i Matio no milaza ny fitanisana ny razan’i Jesoa hatrany amin’i Abrahama, ary ny bokin’i Jaona dia nanambara fa izay rehetra mino an’i Jesoa no hanana ny fiainana mandrakizay. Mitana ny Teny Fikasany ny Andriamanintsika. Fanantenana velona ho antsika Izy.

Ny Fanantenana dia tsy azo avy amin’ny fananan-javatra na fampanantenana paokaty avy amin’izao tontolo izao. Ny fanantenana marina dia azo avy amin’ny fahafantarana fa hiaina ny fiainana mandrakizay miaraka amin’i Jesoa isika. Raha oharina amin’ny fiainana mandrakizay any an-danitra ny zava-miseho amin’ny fiainantsika ankehitriny dia mandalo miserana toa ny indray mipi-maso ihany. Tsy midika akory izany hoe tsy tokony hahatsapa fanaintainana intsony isika fa kosa afaka ny hisafidy ny hampitodika ny fijerintsika tsy any amin’ny fanaintainana fa hibanjina ny ho avy tsara izay miandry antsika.

Na inona na inona lalovanao amin’izao fotoanan’ny fety izao dia banjino ny Teny Fikasan’Andriamanitra ny amin’ny Fanantenana. Tsy handao anao na hamela anao ho irery izany Izy. Hamela ny helokao Izy ary hitarika anao hatrany. Izy no herinao, vatolampy sy fiarovana ho anao. Rehefa mahatsiaro ho tsy mahavita azy ianao, tsy manan-katolotra, tsy afa-po amin’ny tenanao dia tsarovy fa mandalo ihany ireny fotoan-tsarotra ireny ary mbola manomana zavatra maro be ho anao Andriamanitra. Tia anao fatratra Izy ary maniry ny hiaraka aminao. Tsarovy fa nampanantena ho avy ho anao Izy izay mihoatra lavitra noho izay afaka everinao