Omeo lanja ny asanaoSantionany

Miantehatra amin'Andriamanitra tanteraka amin'ny asa atao

Ireo olona tompon'andraikitra “izay” iasantsika dia manana anjara toerana lehibe ary ny fomba fiheverantsika azy ireo dia misy fiantraikany amin'ny lanja izay omentsika ny asantsika. Raha manaja an'ireo mpiara-miasa aminao ianao ary manana fijery miabo ny amin'ny orinasa izay iasanao, dia mora kokoa aminao ny miezaka manao asa tsara. Raha toa kosa nefa ka notsinontsinoavina tamin'ny asanao ianao na manana olana amin'ireo mpiara-miasa aminao dia manjary mora kivy, mora sosotra ary mora tezitra. Ny fitsaratsarana izay mety asehontsika amin'ny manodidina antsika dia mety hampiemotra antsika tsy hanome ny tsara indrindra avy amintsika rehefa miasa isika.

Rariny dia rariny tokoa raha toa ka nahatsapa fahatezerana sy lolom-po ohatra Josefa. Nampidirina am-ponja noho ny heloka izay tsy nataony akory mantsy izy. Tsy izany nefa fa mbola niantehatra tamin'Andriamanitra foana izy ary nanompo ny mpitandrina ny trano-maizina tamin'ny alalan'ny fanaovana asa tsara dia tsara tokoa. Noho izany indrindra, dia natolotra ho andraikitr'i Josefa ny mpifatotra rehetra izay tao an-trano maizina. Rehefa nanonofy ny lehiben'ny mpitondra kapoaka sy ny lehiben'ny mpanao mofo, izay samy natao tao an-trano-maizina ihany koa, dia nihaino azy ireo i Josefa ary nanome ny heviny araka ny filazan'Andriamanitra azy. Izay fahamoram-panahiny izay no nahatonga ny lehiben'ny mpitondra kapoaka hiresaka mikasika azy an'i Farao, rehefa avy nanonofy ihany koa izy ary tsy nisy nahavita nilaza ny heviny. Tamin'ity indray mandeha ity ihany koa, dia niezaka ny tsy ieboebo mihitsy Josefa. Hoy izy mantsy tamin'i Farao hoe tsy misy olona mahalaza ny hevitry ny nofy afa-tsy Andriamanitra irery ihany. Ary dia nazavainy taminy avy eo ny hevitry ny nofy araka izay nolazain'Andriamanitra taminy.

Satria nahatoky tao an-trano maizina i Josefa, dia nomen'Andriamanitra azy ny fahefana hitandrina ny tany Egypta. (Lioka 16:10: “Ary izay mahatoky amin’ny kely indrindra dia mahatoky koa amin’ny be; ary izay tsy marina amin’ny kely indrindra dia tsy marina koa amin’ny be.”). Niaraka tamin'i Josefa foana Andriamanitra hatramin'ny voalohany. Nanomana sy nanome fahendrena ho azy Izy. Ary Nampiasainy ireo trangam-piainana rehetra izay nosedrain'i Josefa hanatanterahana ny Planina izay efa nomaniny ho azy.

Raha toa ka miankina amin'ny toetry ny mpiara-miasa amintsika ny fahazotoantsika dia hiovaova be eo foana ny kalitaon'ny fanoloran-tenantsika. Inona kosa re no mety hitranga raha miantehatra amin'Andriamanitra tanteraka isika amin'ny asa rehetra izay ataontsika? Ny miasa ho an'Andriamanitra dia manome alalana antsika hampiseho asa tsara amin'ny sehatra rehetra izay misy antsika. Ahoana no afaka ataonao mba hianteheranao misimisy kokoa amin'Andriamanitra amin'ny asa izay ataoanao androany?

Vavaka

Ray o, mifona aminao aho fa misy fotoana tokoa dia avelako hanova ny fomba fiasako ny fitsaratsarako ny mpiara-miasa amiko. Ampitomboy ny finoako mba ahafahanao mampiasa ahy hanomezana voninahitra ny anaranao. Miasà ato am-poko mba hananako toetra tsara hatrany any am-piasana. Amin'ny anaran'i Jesoa. Amena.