Omeo lanja ny asanaoSantionany

Safidy avy aty amintsika ny dikan'ny asa amin'ny fiainantsika

Tao amin'ny Genesisy 37:5-7 sy 9, dia nambaran'Andriamanitra an'i Josefa tao anaty nofy ny Antson'Andriamanitra ho azy amin'ny fiainany. Nasehony tao anatin'ireny nofy ireny fa ho apetrany amin'ny toerana ambony tokoa i Josefa, hany ka na ny fianakaviany aza dia hiankohoka eo anatrehany. Feno fialonana tanteraka ny fon'ireto rahalahiny hany ka nikasa ny hamono azy mihitsy izy ireo. Raha nandeha niasa tany amina toerana lavitra be ireto rahalahiny ireto dia mba nankany ihany koa i Josefa hanontany vaovao mikasika an'azy ireto. Nararaotin'izy ireo ary izany fotoana izany dia novarotan'izy ireo ho andevo i Josefa. Sahantsika ny milaza fa kion-dàlana lehibe tamin'ny fiainan'i Josefa mihitsy iny nitranga taminy iny.

Novarotana ho andevo Josefa, noterena hiasa tany amin'ny toerana vahiny - ary ny mponina teo amin'io toerana io dia tsy mba niraharaha an'Andriamanitra izany. Na izany aza nefa tsy nisy olona na iza na iza afaka ny haka ny fahafahana nananan'i Josefa hisafidy ny fitondran-tenany manoloana ny asa izay niandraiketany. Tsy navelan'i Josefa hamaritra ny maha-izy azy ny toerana izay nisy azy. Potifara no lehibeny, nisafidy ny hanao laharam-pahamehana ny fanompoany an'Andriamanitra nefa i Josefa ary ny hanao ny asany tsara. Noho izany dia notahian'Andriamanitra avokoa ny asa izay nataony rehetra, ary nampandraiketan'i Potifara ny fananany rehetra i Josefa.

Samy manana ny asa izay nofinofisintsika ho atao avy isika tsirairay avy. Mety tena mifanalavitra be amin'ilay nofinofinao ny asanao ankehitriny. Na dia izany aza nefa, isika tsirairay avy dia samy misafidy, na fanahy iniantsika na tsia, ny dikany sy ny lanjan'ny asantsika amin'ny fiainantsika. Ny fiheverantsika ny asa izay ataontsika no mamaritra ny fomba itondrantsika ny asantsika. Hita amin'ny kalitaon'ny asa izay ataontsika izany, sy ny fomba izay ahafahan'Andriamanitra mampiasa antsika.

Manana fahafahana ny hanome lanja tsara ny asantsika isika. Rehefa manao izany isika, dia ho mora kokoa amintsika ny hanao asa tsara sy ny haneho ny fahatsaran'i Kristy amin'ny alalan'ny tenantsika.Raha ny tena marina, ny antom-pisiantsika dia i Kristy fa tsy ny asantsika mihitsy. Angataho amin'Andriamanitra ny hanehoany anao ny dikan'ny asa izay ataonao io ao anatin'ny Fanjakany.

Vavaka

Ray o, ampio aho androany ny hihevitra ny asa izay ataoko hifanaraka amin'ny Fijerinao azy. Ampio aho hahatsiaro fa mampiasa ny kalitaon'ny asa izay ataoko Ianao hanehoana ny fitiavan'i Kristy amin'ny manodidina ahy. Enga anie ka hahita Anao Jesoa Kristy amin'ny alalako ireny mpiara-miasa amiko ireny. Amin'ny anaran'i Jesoa, Amen.

Raha maniry ny handalina misimisy kokoa

Jereo hoe toy ny ahoana ny fomba hametrahana tanjona ny asa izay ataontsika, na dia ny asa andavan'andro mahazatra antsika ireny aza, ato anatin'ity blaogy ity (lahatsoratra amin'ny teny anglisy): Workmatters blog.