ពីថ្ងៃនេះឆ្ពោះទៅមុខ - ដោយលោកគ្រូ ក្ហ្រេក-Craig និង អេមី ក្រូឆ៊ែល-Amy Groeschelគំរូ

ចេះមានពេលសប្បាយរីករាយជាមួយគ្នា

ក្នុងគ្រាអ្នកបានភ្ជាប់ពាក្យនឹងគ្នា អ្នកអាចជួបនូវរឿងរ៉ាវសប្បាយៗជាច្រើន។ ក្នុងគ្រានោះ មានរឿងជាច្រើនដែលអ្នកកំពុងទន្ទឹងរងចាំ ហើយរំភើបសម្រាប់ការមកដល់នៃវេលាទាំងនោះ។ ប៉ុន្តែទាំងអស់នេះ គ្រាន់តែដូចជាបង្អួចមួយនៃពេលវេលា នៅក្នុងបរិបទនៃជីវិតទាំងមូល ដែលអ្នកនឹងចំណាយពេលរស់នៅជាមួយគ្នា អស់មួយជីវិត តែប៉ុណ្ណោះ។ តើឱ្យអ្នកអាចនៅបន្តចែចូវ រួមទំនាក់ទំនងដ៏ល្អូកល្អិន និងនៅបន្តស្ថិតនៅក្នុងរយៈកាល ដែលអ្នកស្រឡាញ់គ្នា យ៉ាងខ្លាំង ដូចក្នុងគ្រាកំពុងក្រែបទឹកឃ្មុំ បន្ទាប់ពីប៉ុន្មានឆ្នាំក្រោយ ដែលអ្នកបានរៀបការហើយ យ៉ាងដូចម្ដេចទៅ? តើឱ្យអ្នកអាចបន្តមានភាពសប្បាយរីករាយនឹងគ្នាយ៉ាងដូចម្ដេច នៅពេលដែលអ្នកកំពុងស្ថិតនៅក្នុងសម្ពាធនៃតម្រូវការថវិកា បញ្ហាជាមួយនឹងកូនតូចៗ ឬក៏ស្ថិតនៅក្នុងភាពប្រែប្រួលនៃរដូវកាលនៃជីវិតនោះ? តើអ្នកនៅតែបន្ដតាមចែចូវដៃគូរបស់អ្នក សូម្បីតែបន្ទាប់ពីពេលដែលអ្នកបាន "ចាប់ចិត្ដ" គាត់បានហើយ ដែរឬយ៉ាងណា?

ពិតណាស់!អ្នកត្រូវតែផ្ដល់នូវអទិភាពសម្រាប់ការមានពេលវេលាសប្បាយជាមួយនឹងគ្នា។ ពេលវេលានេះ មើលទៅប្រៀបបីដូចជា ភាពឆើតឆាយ ដែលអ្នកមិនអាចមានថវិកា ឬពេលគ្រប់គ្រាន់សម្រាប់នឹងញែក ប៉ុន្តែតាមពិតទៅ វាពិតជាបំណែកដ៏ចាំបាច់ ដែលអាចនាំឱ្យចំណងអាពាហ៍ពិពាហ៍របស់អ្នកបន្តដើរទៅមុខជាយូរអង្វែងទៀត។ ភាពសប្បាយរីករាយ គឺជាតម្រូវការក្នុងចំណងអាពាហ៍ពិពាហ៍។ ហើយអ្នកអាច ជ្រើសរើស ក្នុងការមានភាពសប្បាយរីករាយជាមួយនឹងដៃគូរបស់អ្នក។

ចុះតើវាមានសភាពយ៉ាងម៉េចទៅវិញ នៅពេលដែលអ្នកសម្លឹងមើលទៅកាន់ចំណងអាពាហ៍ពិពាហ៍របស់អ្នកដទៃ ហើយឃើញថា ជីវិតរៀបការរបស់គេ មើលទៅដូចសប្បាយជាងអ្នកទាំងពីរនោះ? ចុះវាយ៉ាងម៉េចដែរ នៅពេលដែលនារីធ្វើការនៅឯធនាគារគាត់សើច និងចូលចិត្ដកំប្លែងទាំងប៉ុន្មានរបស់អ្នក? ចុះវាយ៉ាងម៉េចដែរ នៅពេលដែលបុរសដែលធ្វើការនៅការិយាល័យរបស់អ្នក គាត់មើលទៅ ដូចតែងតែមាននូវផែនការ ដែលប្រសើរជាងគ្រួសារអ្នក នៅពេលចុងសប្ដាហ៍មកដល់ម្ដងៗនោះ? ប្រសិនបើស្មៅអ្នកជិតខាងអ្នក វាមើលទៅដូចជាស្រស់បំព្រងជាងខាងរបស់អ្នក — ចូរស្រោចទឹកស្មៅរបស់អ្នកទៅ! ចូរមានចិត្ដ មានបំណងធ្វើនេះ ធ្វើនោះ ដើម្បីបង្កើនភាពស្និទ្ធស្នាល និងទំនាក់ទនងយល់ចិត្ដគ្នារបស់អ្នក។ ចូរខំប្រឹងប្រែង តយុទ្ធ ដើម្បីឱ្យអ្នកអាចបន្តជាមិត្ដដ៏ជិតស្និទ្ធបំផុត ដូចគ្រាមុនៗនោះដែរ គឺថា៖ ចូលចិត្ដសើចរួមគ្នា នៅក្បែរល្អូកល្អិននឹងគ្នា សម្លឹងចង់ឃើញ ក្ដីរីករាយ អំណរ និងចិត្ដកក់ក្ដៅរបស់ដៃគូ នោះដែរ។ ប្រហែលជាពិបាកក្នុងការរៀបចំគម្រោងផែនការ សម្រាប់ការមានពេលសប្បាយរួមជាមួយនឹងគ្នា ប៉ុន្តែវាប្រហែលជាទីកន្លែងដែលអ្នកគួរចាប់ផ្ដើម។ ហើយទំនាក់ទំនងនោះឯង ដែលជាអ្វីដែលអ្នកត្រូវការនោះ មែនឬមិនមែន?

ចូរយើងអធិស្ឋានរួមជាមួយនឹងគ្នា៖ ឱ ព្រះបិតាអើយ ទូលបង្គំសូមលន់តួចំពោះអ្វីៗ ដែលទូលបង្គំបានអនុញ្ញាតឱ្យមកកកស្ទះនៅក្នុងពេលវេលាដែលយើងអាចមានរួមជាមួយនឹងគ្នា។ សូមទ្រង់ជួយដល់យើង ឱ្យយើងអាចមានពេលប្រកបជាមួយគ្នា ក្នុងនាមជាស្វាមីភរិយា។ សូមទ្រង់ផ្ដល់យើងនូវប្រាជ្ញា ហើយនិងភាពឆ្នៃប្រឌិត ដើម្បីឱ្យយើងអាចស្វែងរកនូវវិធី ដើម្បីឱ្យយើងអាចរីករាយ ក្នុងការប្រកបរួមជាមួយនឹងគ្នា។ ទូលបង្គំអធិស្ឋាន ដោយនៅក្នុងព្រះនាមព្រះយេស៊ូ។ អាមែន។