ពីថ្ងៃនេះឆ្ពោះទៅមុខ - ដោយលោកគ្រូ ក្ហ្រេក-Craig និង អេមី ក្រូឆ៊ែល-Amy Groeschelគំរូ

ចូរស្វែងរកព្រះជាម្ចាស់

វប្បធម៌សម័យទំនើបប្រាប់តម្រង់ទិសដៅឲ្យយើងស្វែងរកមនុស្សណាដែលល្អឥតខ្ចោះ៖ ម្ចាស់ជីវិតតែមួយ។ ព្រោះអីគេថា ប្រសិនបើ លោកអ្នកស្វែងរកម្ចាស់ស្នេហ៍ដ៏ពិតតែមួយឃើញ នោះពេលរៀបអាពាហ៍ពិពាហ៍រួចហើយ លោកអ្នកនឹងជួបតែសុភមង្គល គ្មានឡើយភាពរកាំរកូស។ តើពិតមែនអត់? បើគិតទៅ នេះជាការរំពឹងទុកមួយដ៏ហួសហេតុ ដែលមនុស្សបានដាក់បន្ទុកទៅលើមនុស្សម្នាក់ទៀត។ ចូរគិតមើល៖ តើលោកអ្នកចង់ក្លាយជាមនុស្សដែលទទួលរ៉ាប់រងរាល់ទំនួលខុសត្រូវមែនឬទេ? បើមិនចង់ទទួលបន្ទុកទាំងប៉ុន្មានទេ តើហេតុអ្វីបានជា ចង់បង្ខិតបង្ខំដល់អ្នកដទៃ ហើយរំពឹងជាច្រើនពីដៃគូរទៅវិញ?

ព្រះជាម្ចាស់តែមួយគត់ដែលអាចបំពេញលោកអ្នកបាន។ ព្រះអង្គបានបង្កើតលោកអ្នកមក ដើម្បីឲ្យស្រឡាញ់ព្រះអង្គឲ្យអស់ពីចិត្ដនិងចាត់ទុកព្រះអង្គខ្ពស់លើអស់អ្វីៗទាំងអស់។ ព្រះជាម្ចាស់ហើយដែលជាម្ចាស់ជីវិតតែមួយរបស់លោកអ្នកនោះ។ ដៃគូរអនាគតរបស់លោកអ្នកគឺជាមនុស្សទីពីរវិញទេ។ ហើយនៅពេលណាដែលអ្នកទាំងពីរប្ដេជ្ញាស្វែងរកព្រះជាម្ចាស់ជាមួយគ្នា លោកអ្នកអាចកសាងនូវអាពាហ៍ពិពាហ៍—ជាមួយគ្នា—នៅលើមូលដ្ឋានគ្រឹះដ៏រឹងមាំ ដែលនឹងបន្តឈរមាំមួន ទោះមានអ្វីៗមកប៉ះពារក៏ដោយចុះ។

តើមានអ្វីដែលអ្នកអាចទូលសូមព្រះជាម្ចាស់ឲ្យធ្វើការនៅក្នុងជីវិតរបស់លោកអ្នក ជាប្រយោជន៍ឲ្យលោកអ្នកបានក្លាយទៅជាដៃគូរយ៉ាងល្អប្រសើរសម្រាប់គូរអនាគតរបស់លោកអ្នកដែរឬទេ? ដើម្បីឲ្យលោកអ្នកបានក្លាយទៅជាមនុស្សដែលខ្លួនលោកអ្នកផ្ទាល់ចង់រៀបការជាមួយនោះ។ ចូរឲ្យអ្នកទាំងពីរដែលជាដៃគូរ ស្វែងរក ម្ចាស់ជីវិតតែមួយ ជាមួយគ្នា។ លោកអ្នកអាចចាប់ផ្ដើមបានដោយចំណាយពេលអធិស្ឋានរួមជាមួយគ្នាជារៀងរាល់ថ្ងៃ បើទោះបីជាតាមការផ្ញើសារ តាមទូរស័ព្ទ ឬក៏តាមភាពស្ងៀមស្ងាត់ជាមួយគ្នាក៏ដោយចុះ។

ចូរឲ្យយើងទាំងអស់គ្នាបានសង្រួមចិត្ដអធិស្ឋានជាមួយគ្នា៖ឱ ព្រះជាម្ចាស់! សូមជួយយើងខ្ញុំ ឲ្យបានចាត់ទុកព្រះអង្គជាលេខមួយនៅក្នុងជីវិតនៃក្រុមគ្រួសាររបស់យើងខ្ញុំ និង ឲ្យយើងខ្ញុំចេះស្វែងរកព្រះអង្គជាមួយគ្នាផង។ សូមជួយឲ្យយើងខ្ញុំ ចេះកសាងនូវមូលដ្ឋានគ្រឹះដ៏រឹងមាំ ដោយ កសាងទំនាក់ទំនងរបស់យើងខ្ញុំ នៅក្នុងព្រះអង្គ។ សូមជួយឲ្យយើងខ្ញុំ ចេះប្ដេជ្ញាចិត្ដក្នុងការចំណាយពេលទៀងទាត់ អធិស្ឋានជាមួយគ្នា ជារៀងរាល់ថ្ងៃ។ យើងខ្ញុំសូមអរព្រះគុណទ្រង់ នៅក្នុងព្រះនាមព្រះយេស៊ូវ។ អាមែន។