Prysurdeb Sanctaidd: Cofleidia Fywyd o Waith Caled, Gorffwys DaSampl

Dw i'n dod o deulu eang o ferched sy'n gweithio, ac wrth wneud gwaith dw i'n ei fwynhau, dw i'n gweddïo y bydd fy merch yn dysgu i ddilyn ei breuddwydion, gweithio'n galed, ac ufuddhau i Dduw, i ble bynnag mae e'n ei galw. Dw i'n gweddïo y bydd yn dysgu gen i fod prysurdeb sanctaidd yn golygu cofleidio'r gwaith dŷn ni wedi'i gael, ond dod o hyd i'n gwerth yn yr un a'n creodd i wneud y gwaith. Mae gwerth i'n gwaith a'r hyn dŷn ni'n ei wneud i wasanaethu Duw, ein cymdogion, a'n teuluoedd yn bwysig - ond nid hyn sy'n ein diffinio.

Mae gan y Gair lawer i'w ddweud am werth gwaith:

Sgwennodd Paul at yr Effesiaid i'w hatgoffa fod Duw wedi trefnu pethau da i'w blant eu gwneud a'n bod wedi ein creu i'w gwneud (Effesiaid 2:10).

Mewn llythyr arall gan Paul mae e'n annog y Corinthiaid i sefyll yn gadarn, rhoi eu hunain yn llwyr i'r gwaith, gan wybod nad yw'r gwaith sydd wedi'i wneud ar ran Duw, yn ofer (1 Corinthiaid 15:58).

Gweithiodd y wraig yn Diarhebion 31 yn fodlon, prynodd a gwerthodd dir gyda'i henillion, creodd, planodd, rheolodd (Diarhebion 31:10-31).

Gweithiodd Debora fel barnwr ac roedd fwy neu lai'n gadlywydd militaraidd (Barnwyr 4-5).

Ystyria dy syniadau, yn dda a drwg, am dy waith. Beth mae'r llais mewnol yn ei ddweud wrthot ti am y tasgau rwyt yn eu cyflawni bob dydd? Wyt ti'n teimlo fod yna unrhyw werth i dy waith, neu wyt ti'n ystyried nad ydyw "fawr o werth" o'i gymharu â swyddi, cyfrifoldebau a rolau eraill? Wyt ti'n teimlo dy fod yn gwastraffu dy amser yn syllu ar sgrîn dy gyfrifiadur pan mae dy deulu dy angen, neu wyt ti'n poeni dy fod yn colli allan ar amser gyda dy deulu? Wyt ti, a siarad yn gyffredinol, yn teimlo'n dda, drwg neu'n ddifater am dy waith?

Mae gwerth i'n gwaith pan mae'n cael ei wneud er gogoniant i Dduw a chyda chalon lawen. Pan mae e'n ein galw i waith, ble bynnag y mae a sut bynnag mae'n edrych, mae e'n rhan o'i gynllun ar ein cyfer, yn rhan o'r ffordd y cawsom ein creu i'w wasanaethu fe a charu ein cymdogion.