Елісей: аповесьць пра надзвычайную веруУзор

Разважаючы над Елісеевым жыцьцём, мы бачым, што шмат якія цуды, якія ён учыніў, зьяўляюцца вельмі падобнымі да Ісусавых цудаў. У 4 Царстваў 4:8-37 Елісей учыніў адзін з такіх цудаў, калі вылечыў Санаміцянкавага сына. Калі Елісей пазнаёміўся з гэтаю жанчынаю, яго гэтак уразіла ейная дабрыня й гасьціннасьць, што ён вырашыў узнагародзіць яе тым, што - як яму падавалася - ей хацелася найбольш - дзіцём. Бог даў ёй дзіця, але празь некалькі гадоў яно памерла, і жанчына папрасіла, каб Елісей вярнуў яму жыцьцё. У гэтай аповесьці ёсьць дзьве цікавыя рэчы. Па-першае, дзіўны спосаб, якім Елісей спрабуе ўваскрэсіць хлопчыка: прыклаўшы свае вусны да ягоных вуснаў, свае вочы да ягоных вачэй і свае далоні да ягоных далоняў. Па-другое, той факт, што Елісею не ўдалося ўваскрэсіць хлопчыка зь першае спробы.

Колькі разоў ты апынаўся ў падобных абставінах? Ты просіш нечага ў Бога і ведаеш, што Ён здолее зрабіць гэта, але адказ не прыходзіць адразу ж. Часам тое займае дні, месяцы й нават гады. Не здавайся, калі нічога не выходзіць зь першага разу. Працягвай маліцца. Працягвай шукаць Госпада. Ён адкажа на твае малітвы ў спосаб і час, найлепшы для цябе. Ня страчвай надзеі й працягвай маліцца. Што ты ўжо доўгі час просіш у Бога, але Ён яшчэ не адказаў? Што ты можаш зрабіць, каб упэўніцца, што ты ня кінеш прасіць і шукаць Бога ў малітве пра гэтую рэч?