Жыцьцёвыя правілы, якіх варта прытрымліваццаУзор

Змагайцеся на каленях

Жыцьцёвае правіла нумар 8: Заўсёды змагайцеся на каленях, і вы пераможаце ў кожнай бітве.

Вера – гэта казаць Богу: «Я веру, што Ты тое зробіш». Падчас змаганьня з ворагам, мы можам памаліцца наступным чынам: «Я веру, што Ты паб’еш ворага, і ён уцячэ ад мяне, у той час як я яму супрацьстаю і давяраю Табе». Зноў ды зноў Давід абвяшчаў сваю веру Госпаду: «Божа мой! На Цябе спадзяюся» (Псалом 24:2, а таксама 30:7). У дасканалай веры кожная бітва ёсьць завершанай і перамагае Бог. Калі Давід сказаў «На Цябе спадзяюся», ён меў на ўвазе: «Зьдзейсьнілася. Госпадзе, Твой характар дасканалы. Ты ўсё робіш добра. І Ты перамог усіх маіх ворагаў». Ён цалкам верыў у Божую здольнасьць. Нават і намінку не было накшталт «я спадзяюся, што Ён тое зробіць», бо Давід ведаў, што тое ўжо было амаль зроблена.

Мы расьцем у веры тады, калі мы яе практыкуем, давяраючы Богу ў кожнай сытуацыі, у кожных абставінах і ў кожных узаемаадносінах. Мы разьвіваем асабістую гісторыю, у якой мы слухаемся Бога, а Ён застаецца верным нам у Сваёй ласкавай руплівасьці да нас.

Немагчыма доўга супрацьстаяць д’яблу, калі вы ня верыце, што Ісус праз вас здолее перамагчы й пераможа яго. Да таго ж, вы можаце заставацца цьвёрдымі ў вашай веры толькі тады, калі вы цалкам скорыцеся Богу ўва ўсіх сфэрах вашага жыцьця. Калі вы не пагаджаецеся скарыць праблему альбо сфэру Госпаду, то вы фактычна кажыце: «Я магу зрабіць гэта сам. Мне не патрэбна Твая дапамога». І гэта як раз тое, што Шатан хоча, каб вы рабілі: класьці надзею на вашую асабістую здольнасьць, а не на Ўсемагутнага Бога. І як раз у гэтым месцы ён скіруе сваю найвялікшую атаку супраць вас!

Добрая навіна заключаецца ў тым, што Бог дае кожнаму з нас канкрэтную колькасьць веры на разьвіцьцё. Ён таксама дае нам здольнасьць давяраць Яму ды скараць нашае жыцьцё Яму. Мы можам быць непахіснымі й супрацьстаяць ворагу, але толькі з Божай дапамогай. Ён чуе нашыя малітвы ды ймчыцца нам на абарону. Калі мы молімся, Шатан уцякае.