Жыцьцёвыя правілы, якіх варта прытрымліваццаУзор

Змрочныя моманты жыцьця

Жыцьцёвае правіла нумар 7: Змрочныя моманты нашага жыцьця доўжацца столькі часу, колькі Богу неабходна на тое, каб рэалізаваць Сваю мэту ў нас.

Калі вы жадаеце бачыць у вашым жыцьці ўсё найлепшае, што Бог заплянаваў дзеля вас, і хочаце, каб Ён выкарыстоўваў вас, то абавязкова надыдзе той момант, калі вам прыйдзецца ісьці шляхам няшчасьця. Гэта азначае, што Бог можа выкарыстоўваць і будзе выкарыстоўваць няшчасьці ў вашым жыцьці дзеля добрае мэты – тым ня менш многія людзі, на жаль, лічаць нядолю паразай і нечым адмоўным. Але вы ня мусіце так разважаць.

Бог прызначыў няшчасьце – незалежна ад таго, што яго выклікае – на тое, каб яно стала паваротным пунктам у вашым духоўным жыцьці, які прымусіў бы вас інтэнсіўна расьці. Бог дазваляе нядолі заставацца ў вашым жыцьці, пакуль Ягоная мэта не рэалізуецца ў вас. Ён не дазволіць ёй быць у вашым жыцьці даўжэй, чым патрэбна.

Цяперака, дакладна там, дзе вы знаходзіцеся, памятайце наступнае: Бог вызначыў межы няшчасьця. З прычыны таго, што вы зьяўляецеся Божым дзіцём, Сьвяты Дух жыве ў вас, і Ён ведае, колькі вы здолееце перанесьці. Пясьняр сказаў: «Многа турботаў у праведніка, і ад усіх іх Гасподзь вызваляе» (Псалом 33:20). А яшчэ: «Як бацька даруе сынам, так даруе Гасподзь тым, хто баіцца Яго. Бо Ён ведае склад наш, памятае, што мы – пыл» (Псалом 102:13-14).

Бог выкарыстоўвае няшчасьці, каб ператварыць вас у дарослага ды эфэктыўнага слугу. Калі вы знаеце Бога як Збаўцу, то Ён бачыць вас сьвятым, які часам змагаецца зь цяжкасьцямі, часам падае, але заўсёды зьяўляецца апраўданым, збаўленым, памілаваным ды прыміраным зь Ім. Ён бачыць чалавека, поўнага безумоўнае любові, у якім жыве Ягоная прысутнасьць, запячатанага праз абяцаньне Сьвятога Духа, імя якога запісана ў кнізе жыцьця Ягняці. Апрача таго, Ён бачыць увесь ваш патэнцыял – усё тое, што вы можаце зрабіць дзеля Ягонага Валадарства. Дык суцешцеся: няшчасьце не застанецца ў вашым жыцьці назаўсёды. Але калі яно прыходзіць, то зь яго можа выйсьці нешта добрае, калі вы давяраецеся Яму. Таму, нягледзячы на ўсе змрочныя моманты, якія вы перажываеце, будзьце ўпэўненыя ў тым, што Ён абавязкова прывядзе вас да сьвятла. І калі Ён гэта зробіць, дык яно безумоўна будзе таго вартае.