Жыцьцёвыя правілы, якіх варта прытрымліваццаУзор

Наш якар падчас шторму

Жыцьцёвае правіла нумар 3: Божае Слова – гэта нерухомы якар у час шторму.

Кожны з нас можа прыгадаць тыя моманты, калі нам хацелася пачуць пэўнае слова ад Бога – нешта такое, да чаго мы маглі б ліпнуць, калі мы сумняваемся або баімся. Бог ведае, калі нам патрэбна падбадзёрваньне, кірунак і надзея. З гэтае прычыны Ён даў нам у Сваім Слове канкрэтныя абяцаньні, каб мы маглі зразумець Ягоны характар і даверыцца Яму. Калі мы перажываем эмацыйна спусташальныя сытуацыі, то Божыя абяцаньні зьяўляюцца істотнымі для нашага духоўнага дабрабыту.

Гэткім чынам, Ягонае Слова – гэта компас, паказальнік дарогаў, інфармацыйны даведнік па жыцьці. Мы мусім карыстацца Божым Словам у якасьці нашай крыніцы мудрасьці й праўды так, як мы карыстаемся інструкцыямі на працы альбо ў кухні. Ніхто не пячэ пірог без рэцэпту, і ніводны аўтамэханік не пачынае адбудоўваць матор машыны без дапаможніку.

Часам Бог нагадвае нам канкрэтны ўрывак са Сьвятога Пісьма, які поўніць нас надзеяй ды супакоем. Часам Ён запрашае нас маліцца й шукаць Ягонай мудрасьці ў той ці ў іншай сытуацыі. Калі мы спадзяемся на Бога ў веры, то Ён абавязкова накіруе нас згодна са Сваёй воляй. Хутчэй за ўсё, гэта не адбудзецца адразу. Часта Бог жадае, каб мы паразважалі над тым ці іншым вершам пэўны час, і толькі пасьля таго Ён паказвае нам накіраваньне.

Вось што кажа Біблія пра тое, калі Давід валадар шукаў Божае волі на тое, каб пабудаваць храм: «І пайшоў Давід валадар, і стаў прад абліччам Госпада» (2 Царстваў 7:18). Давід не загадаў сваім людзям адразу ж пачаць будаваць. Ён чакаў Божага кіраўніцтва – і добра, што ён тое зрабіў, бо Госпад хацеў, каб Давідаў сын Саламон, а ня сам Давід, пабудаваў той храм.

Аднак Бог усё адно ўшанаваў Давідава стаўленьне й паабяцаў яму цудоўную рэч: «І будзе непахісны дом твой і валадарства тваё навек прад абліччам Маім, і трон твой стаяцьме вечна» (2 Царстваў 7:16). Госпад заўсёды паважае нашае жаданьне шукаць Ягонага кіраўніцтва ды мудрасьці. Калі мы ідзем да Бога, спадзеючыся атрымаць адказ, то Ён ніколі не расчаруе нас.