Жыцьцёвыя правілы, якіх варта прытрымліваццаУзор

Ключ да хрысьціянскага жыцьця

Жыцьцёвае правіла нумар 24: Жыць па-хрысьціянску азначае дазваляць Ісусу жыць у нас ды праз нас.

Шмат хто з хрысьціянаў вядуць, як яны думаюць, адэкватнае хрысьціянскае жыцьцё — і іх тое задавальняе. Яны думаюць, што калі яны наведваюць царкву ды час-часом чытаюць Біблію й моляцца, то яны будуць у добрых адносінах з Богам. І хоць яны й жывуць як “добрыя хрысьціяне” машынальна, яны ўсё ж не адчуваюць тую сілу, супакой ды радасьць, якія прыходзяць з насычаным жыцьцём, якое паабяцаў ім Ісус (Яна 10:10). Урэшце, удаванае хрысьціянскае жыцьцё, якое яны вядуць, становіцца грузам, які не суцяшае іх, калі іх надыходзіць бура няшчасьцяў.

Вас стварылі ня дзеля гэтага. Бог нікога не заклікае да нязначнага хрысьціянскага жыцьця, поўнага нуднае работы ды рытуалаў. Ён жадае мець штодзённыя адносіны з вамі, празь якія вы змаглі б адчуваць Ягоную прысутнасьць ды ведаць, што Ён дасьць вам мудрасьць, адвагу ды моц у любых абставінах. Госпад жадае праслаўляць Сябе праз вас у кожным кроку, які вы робіце, у кожным рашэньні, якое вы прымаеце, у кожнай думцы, якую вы думаеце. Ён хоча зьзяць у вашым жыцьці, асьвятляючы вашыя непаўторныя здольнасьці, рысы ды характар, у той час як вы жывяце ў паслушэнстве Яму.

Інакш кажучы, жыць па-хрысьціянску азначае дазваляць Ісусу жыць у вас ды праз вас. Менавіта з гэтае прычыны Павал напісаў: “Я ўкрыжаваўся з Хрыстом, і ўжо ня я жыву, а жыве ўва мне Хрыстос. А што цяпер жыву ў целе, дык жыву вераю ў Сына Божага, Які палюбіў мяне й аддаў Сябе за мяне” (Галятаў 2:20).

То як вы можаце дазволіць Ісусу жыць у вас ды праз вас? Па-першае, вы можаце тое зрабіць, адводзячы час на вывучэньне Бібліі, малітву, праслаўленьне ды сяброўства зь іншымі вернікамі. Вы ня толькі павінны даведвацца больш пра Яго, але таксама слухаць Яго, бо Ён навучыць вас любіць Яго, жыць дзеля Яго ды хадзіць Ягонымі шляхамі.

Па-другое, найважнейшая рэч, якую вы можаце зрабіць — гэта папросту слухацца Яго, нягледзячы на тое, што Ён загадвае вам рабіць. Той самы Бог, Які збавіў вас, здолее навучыць вас жыць дзеля Яго. Той самы Збаўца, Якому вы даверылі вашую вечнасьць, цалкам здатны на тое, каб падбаць пра ўсё тое, што абцяжарвае вас штодня, зьзяючы праз вас, каб іншыя людзі змаглі даведацца пра Яго ды атрымаць збаўленьне. Дык адкіньце ўсе вашыя разуменьні аб тым, якім павінна быць хрысьціянскае жыцьцё, каб вы змаглі зазнаць сапраўднае жыцьцё ў Ім.