Жыцьцёвыя правілы, якіх варта прытрымліваццаУзор

Жыцьцёвыя цяжкасьці

Жыцьцёвае правіла нумар 29: Ліхія часы навучаюць нас лепш за бестурботныя.

Нядоля, пакуты, выпрабаваньні, гора ды смутак дзейнічаюць як урокі ў школе досьведу. Яны вядуць нас да новага спасьціжэньня ды разуменьня. Яны здолеюць зьмяніць нашае сьветаўспрыманьне, нашае ўяўленьне аб Богу і вымушаюць нас зьмяняць нашыя паводзіны. Госпад, вядома, зьяўляецца найлепшым настаўнікам. Калі мы хочам зразумець сэнс нейкага ўроку зь нядолі, то мы павінны зьвяртацца да Яго.

Бог дапускае нядолю з сама меней трох прычынаў:

1. Каб захапіць нашую ўвагу

Госпад карыстаецца рознымі мэтадамі, каб прыцягнуць нашую ўвагу, калі трэба, – і нядоля зьяўляецца адным з гэтых мэтадаў. Не марудзьце адказваць Госпаду, калі Ён робіць нешта такое, каб прыцягнуць вашую ўвагу. Адказвайце хутка ды пакорліва. Паслухайце, што Ён жадае прамовіць вам.

2. Каб праверыць нас

Часам Бог дапускае нядолю дзеля таго, каб прымусіць нас праверыць саміх сябе. Вятры нядолі разьвейваюць павярхоўныя пытаньні ды вымушаюць нас успрымаць рэчы на больш глыбокім узроўні. Нішто не набліжае нас да Бога так, як нядоля. Яна здымае з нас маску пярэчаньня і паказвае, хто мы ёсьць насамрэч, а таксама нашыя сапраўдныя ўяўленьні пра Бога, Ягоную боскасьць ды вернасьць.

Павал вучыў Карынцянаў: «Няхай жа выпрабоўвае сябе чалавек» (1 Кар 11:28). Інакш кажучы, «Шчыра паглядзеце ўнутр ды вызначце, што вамі кіруе, што вас матывуе й вабіць». Калі гэта ня Бог, то гэта нядобра. Менавіта Бог павінен быць вашай рухаючай сілай у кожных жыцьцёвых абставінах.

3. Каб падштурхнуць нас зьмяніць нашыя паводзіны

Бог ня проста жадае захапіць нашую ўвагу альбо дапамагчы нам шчыра паглядзець на нашае жыцьцё. Мы мусім таксама даць Ягонаму Духу свабодны доступ да кожнай сфэры нашага жыцьця. Калі мы ня зьменім нашую рэакцыю ды паводзіны, то мы ніколі не атрымаем карысьць ад ліхіх часоў жыцьця, а ў рэзультаце ня вырасьцем духоўна. Бог дае нам выклік, і мы маем магчымасьць паслухацца Яго альбо не паслухацца. Выбар наш, як і вынікі.

Калі вы згодныя дазволіць Богу вывесьці на паверхню вашае ўнутранае сьмецьце – і калі вы згодныя зьмяніць усё тое, што неабходна зьмяніць – то вы выйдзеце зь няшчасьця ў шчыльнейшых адносінах з Хрыстом, больш дарослымі як Ягонае дзіцё ды з нашмат большым патэнцыялам дэманстраваць Божую любоў навакольнаму сьвету.