Жыцьцёвыя правілы, якіх варта прытрымліваццаУзор

Паслушэнства заўсёды прыносіць дабраславеньне

Жыцьцёвае правіла нумар 21: Паслушэнства заўсёды прыносіць дабраславеньне.

Простыя просьбы Госпада часта служаць мостам да найцудоўнейшых дабраславеньняў. Сымон Пётар дэманструе, што можа адбыцца, калі мы кажам Богу «так».

Аднойчы вялікі натоўп ціснуўся да Ісуса ў той час, як Ён прапаведаваў (Лукаша 5:1-11). Ісус хацеў выкарыстаць Пётраў човен у якасьці плывучае плятформы, каб прамовіць да натоўпу, і таму Ён папрасіў будучага апостала адплыць крыху ад берагу – у гэтай просьбе не было нічога незвычайнага. Але Пётрава згаворлівасьць адкрыла шлях дабраславеньню, якое перамяніла ягонае жыцьцё. З гэтага прыкладу мы бачым, што слухацца Бога зьяўляецца істотным нават у неістотных пытаньнях.

Напрыканцы Свайго ўроку Ісус загадаў Пятру: «Адплыві на глыбіню, і закіньце мярэжы свае дзеля лову» (5:4). Магчыма, што Пётар меў ахвоту адмовіць. Усё ж ён быў дасьведчаным рыбаком. Ён працаваў усю ноч, каб злавіць нешта, але вярнуўся з пустымі рукамі. І вось зараз гэты малады настаўнік (пры тым цясьляр, а не рыбак) просіць яго парыбачыць зноў?

Празь веру Пётар адказаў: « Настаўнік! Мы працавалі ўсю ноч і нічога не злавілі; але па слове Тваім закінем мярэжу»(5:5). Менавіта гэты адказ дэманструе пачатак Пётравай веры ў Бога, якая доўжылася ўсё ягонае жыцьцё. Гэты чалавек, які неўзабаве меўся стаць вучнем, абраў паслухацца Госпада і пакінуць наступствы свайго рашэньня Яму.

Рэзультатам ягонага паслушэнства стаў паказ Ісусавай сілы ды аўтарытэту. На пачатку таго дня Пётар ды ягоныя супольнікі думалі, што іхнія высілкі не прынесьлі анічога. Але напрыканцы дня яны цалкам зьдзівіліся, калі выцягнулі не адзін, а два чаўны рыбы настолькі поўныя, што пачалі залівацца (5:7). Станоўчы адказ на Госпадаву просьбу прынёс цуд, які ператварыў ня толькі жыцьцё аднаго рыбака, але й жыцьцё цэлае групы людзей.

Магчыма, вы не рашаецеся слухацца Бога ў вашым жыцьці, бо баіцеся наступстваў вашага рашэньня. Але Госпад загадвае вам шанаваць Яго перадусім. Той жа самы сувэрэнны, усемагутны Бог, дзякуючы Якому б’ецца вашае сэрца ды круцяцца на арбіце плянэты, цалкам здольны разабрацца з наступствамі вашага паслушэнства. Калі вы абіраеце слухацца Яго, то Ён дабраславіць вас. Паслушэнства заўсёды прыводзіць да дабраславеньня. З гэтае прычыны, хай паслушэнства Госпаду стане вашай мэтай, і вы ўбачыце, як Ён будзе дзеіць у вашым жыцьці.