Жыцьцёвыя правілы, якіх варта прытрымліваццаУзор

Пераадольваючы ўпадак духу

Жыцьцёвае правіла нумар 20: Расчараваньні зьяўляюцца непазьбежнымі, але ўпадак духу — гэта выбар.

Госпад мае ўнікальны плян для вашага жыцьця — і той плян не зьмяняецца пад уплывам нечаканых акалічнасьцяў. Калі вы апынаецеся ў абставінах, якія не адпавядаюць вашаму разуменьню Божага пляну на вашае жыцьцё, то вы мусіце спыніцца ды зьвярнуцца да Яго за напрамкам. Часам Ён дазваляе вам перажываць расчараваньні, каб вы навучыліся поўнасьцю давярацца Яму і хадзілі вераю, а ня бачаньнем. Але ніколі не забывайцеся, што ў той час, як расчараваньні непазьбежныя, упадак духу — гэта выбар. Вы ніколі не павінны дазваляць цяжкасьцям, якія вы перажываеце, красьці ў вас ваш запал ды ўпэўненасьць у Ім.

Ува ўсіх вашых штодзённых расчараваньнях, якія пагражаюць змарнаваць вашыя эмацыйныя рэсурсы ды адвесьці вашую ўвагу ад Госпада, у вас Ёсьць сапраўдная надзея ды сапраўдны выбар радасьці ды багатага жыцьця ў Ісусе. Абставіны не кіруюць вамі; вамі кіруе Ісус. Вы ніколі не павінны быць ахвярай вашых пачуцьцяў. Вы можаце зьвярнуцца да Бога, паслухаць, навучыцца ды ісьці далей. У той час як вы будзеце тое рабіць, усе параненыя ды прыгнечаныя часткі вашага сэрца й шрамы ад старых расчараваньняў загояцца ў Божай любові, што аднаўляе.

Бог сапраўды мае шмат дабраславеньняў для вас — болей, чым вы сабе можаце ўявіць. Выпусьціце ўсе расчараваньні ды страх спадзявацца й давярацца зноў. Бог трымае вашую будучыню ў Сваіх руках, і вы ніколі не прайграеце, чакаючы таго, што Ён мае для вас у запасе.