Жыцьцёвыя правілы, якіх варта прытрымліваццаУзор

Замоцная хватка

Жыцьцёвае правіла нумар 19: Вы страціце ўсё тое, за што вы трымаецеся замоцна.

Прызнайцеся, ваш першы эмацыйны адказ у складаных абставінах – гэта ўзяць усё пад кантроль. Кожны з нас жадае кантраляваць усё. Мы жадаем жыць з пэўнасьцю, што ўсё будзе добра, і што мы здолеем вырашыць усе тое, што ў дадзены момант ідзе ня так, калі мы толькі пастараемся. Мы часта думаем употай: «Калі я добра ўсё спляную ды дастаткова папрацую, то я здолею пераадолець усякія цяжкасьці».

Праблема пачынаецца тады, калі нашыя высілкі аказваюцца недастатковымі – калі цяжкасьці, якія мы перажываем, ёсьць большымі за ўсе нашыя магчымасьці альбо знаходзяцца па-за зонай нашага ўплыву. Бог дапушчае гэткія выпрабаваньні з важнай прычыны: Ён хоча, каб мы прызналі, што Ён мае кантроль.

Калі вы апынаецеся ў абставінах, якія хутка вычэрпваюць вашыя духоўныя, эмацыйныя ды фізычныя запасы, то праз страх вы можаце пачаць чапляцца за нешта моцнае. Вы мусіце паразважаць над наступным пытаньнем: куды вас кіруюць вашыя турботы, да Божых рук або да вашых уласных рэсурсаў?

Ці вы трымаецеся нечага апроч Госпада? Ці вы хапаецеся за нейкую разнавіднасьць зямной пэўнасьці, заміж таго, каб дазволіць Яму дапамагчы вам? Памятайце, вы страціце ўсё тое, за што вы трымаецеся замоцна. Усё тое, за што вы чапляецеся ў пошуках бясьпекі, становіцца вашым ідалам. Што б гэта ні было – багацьце, здольнасьці, узаемаадносіны, рэлігійныя рытуалы – Бог не дазволіць вам мець тое за вашую крыніцу ўпэўненасьці, бо гэтая роля справядліва належыць Яму. Заміж таго, Ён дазволіць тым рэчам падвесьці вас, каб вы пабачылі, што Ён сапраўды зьяўляецца вашым сувэрэнным Госпадам, Які ніколі вас не падвядзе.

Бог прагне, каб вы паддаліся Ягонай уладзе ды вечнай падтрымцы. Ён падбае пра ўсё тое, што датычыцца вас, найлепшым спосабам, і Ён таксама падтрымае вас у працэсе (Піліпянаў 4:6-7). Хоць Госпад час ад часу будзе выпрабоўваць вас, мэтай таго заўсёды будзе паказаць вам Яго любоў, якая ніколі не канчаецца.