Geestelike OorlogvoeringVoorbeeld

DAG 1: Die Stryd Teen Die Bose

Nadat ek gered is, het ek gedink ek gaan my lewe langs stille waters en by groen weivelde leef. Ek het geen idee gehad dat ek eintlik as 'n soldaat in God se weermag aanmeld nie.

Sedertdien het ek geleer dat gelowiges soldate is en Jesus nie gekom het om vrede nie, maar die swaard te bring. Ek het ontdek dat ek meer as 'n oorwinnaar in Christus is. Dit impliseer natuurlik ook dat goddelose en onsigbare magte probeer om my te oorwin.

Hou hierdie waarheid in gedagte: die vyand kom om dood te maak, te steel en te vernietig. Elke bose gees het dieselfde doel voor oë. Hoe hulle die doel bereik — hul strategieë en benaderings — verskil. 'n Gees van vrees val jou geloof aan, terwyl 'n gees van verwerping jou identiteit aanval. Die Satan is strategies. Sy weermag is uiters georganiseerd en hy stuur spesifieke geeste om gelowiges te weerhou van hulle koninkryksdoel.

My gebed is dat jy 'n onderskeidingsvermoë sal ontwikkel om geeste wat jou lewe — en die lewens van jou geliefdes — teëstaan, te kan uitken en dat jy die nodige geestelike vaardighede sal ontwikkel om terug te veg. Geestelike slawerny kan op baie maniere openbaar word, maar die goeie nuus is dat die oorwinning joune kan wees. Wanneer ons met Godgegewe gesag leef, kan ons doeltreffend oorlog voer en wen.