Wanneer die Heilige Gees werkVoorbeeld

Die Gees verheerlik vir Christus

As die Heilige Gees jou lewe kom oorneem, sal jy ervaar dat Christus in jou verheerlik word. Christus se beeld sal al duideliker in jou verskyn en sy liefde en sy werke sal in en deur jou realiseer. Jy word minder en Christus word meer.

Daar is min dinge wat mense so afstoot en ’n weersin in godsdiens wek as aangeplakte voorgee- godsdienstigheid — skynheiligheid. As die Heilige Gees ’n mens se lewe egter vervul, skyn God se heerlikheid deur jou en raak mense van Jesus se gesag en realiteit bewus. Ons as Christene moet die Bybel lééf sodat die wêreld sal agterkom dat Christus waarlik leef. As die Heilige Gees ons lewe beheer, sal mense Christus se woorde op ons lippe hoor.

Petrus het Christus beskaam toe hy nie die vrymoedigheid gehad het om openlik vir Christus te getuig nie. Nadat Petrus egter vervul is met die Heilige Gees, kon hy nie meer stilbly nie en het hy met groot gesag die waarhede van Christus verkondig. Hy het beleef hoe duisende mense tot bekering kom. Christus is verheerlik deur Petrus se lewe.

As die Heilige Gees ons lewe vervul, word ons verander en begin die eienskappe en karaktertrekke van Christus al duideliker in ons lewe na vore kom. As die Gees ons vervul, sal ons lewe die vrug dra van liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing (Galasiërs 5:22-23). So sien en ervaar mense hoe God werklik is deurdat hulle Hom leer ken in Christene.

Heilige Gees, vervul my só dat Jesus al duideliker in my lewe gesien sal word en Christus deur my al meer verheerlik sal word.

Amen