Wanneer die Heilige Gees werkVoorbeeld

Die derde Persoon van die Drie-eenheid

Ons as mense sal God nooit kan verstaan, begryp of verklaar nie.

Hoe kan die skepsel ooit sy Skepper verklaar? Ons as mense is van ’n totaal ander orde as God.

God is ewig, alomteenwoordig, alwys en almagtig. Hy is ons Skepper en ons is die werk van sy hande. Daarom leer die Bybel ons nie om vir God te verstaan nie, maar Hom lief te hê, te aanbid, te loof, te gehoorsaam en in Hom te glo.

Tog leer ons uit die openbaring van God in die Skrif, soos in 2 Korintiërs 13, dat God wat een is ook drie is.

Die God van die Bybel is die enigste en die ware lewende God wat Een is, maar ook drie, naamlik Vader, Seun en Heilige Gees. Soos wat ’n eier bestaan uit ’n dop, ’n wit en ’n geel, so kan ’n man byvoorbeeld vir sy vrou ’n eggenoot wees, ’n seun vir sy pa en ook ’n pa vir sy kinders.

Alhoewel hy drie is, is Hy eintlik ook net een. Die Bybel leer ons dat God ons Vader is wat ons liefhet en vir ons sorg. God is ook Immanuel — “God met ons”. Hy is die Verlosser wat ons sonde wegneem en die skeiding tussen God en mens afbreek sodat ons by God kan wees. Die Bybel leer verder dat God in ons is en deur die Heilige Gees in ons wil woon. God is een, maar tog ook drie.

Ons kan nie vir God met ons sondige verstand probeer verstaan nie. Ons moet Hom as Vader liefhê en dank vir sy troue sorg. Ons moet God as ons Verlosser eer wat ons sonde weggeneem en ons skoon en nuut gemaak het. En ons moet God liefhê wat in ons woon en in ons wil lewe deur sy Gees.

Aanbid jy ’n twee-eenheid of vir God Drie-enig?