21 Dae GebedVoorbeeld

Kinders van God leef eerstens met die realiteit van God se bestaan en die oortuiging dat Hy bestaan en betrokke wil wees in ons lewens. Hierdie realiteit is nie net 'n wete nie, dit is ‘n bewustheid en 'n oortuiging. Baie mense weet van God, glo in sy bestaan, maar as ek soos ‘n kind van God leef, is ek oortuig van Hom en heeltyd bewus van Hom.

Tweedens, kinders van God beoefen sy teenwoordigheid. Hierdie frase is bekend gemaak deur Brother Lawrence, die sewentiende eeuse gelowige wat die boek Practicing the presence of God' geskryf het. Om God se teenwoordigheid te beoefen is om van die wete dat Hy bestaan en teenwoordig is, te groei na die oortuiging dat Hy werklik teenwoordig is.

Derdens, wil kinders van God Hom eer en tevrede stel. Wanneer ons die liefde van God vir ons, die realiteit van sy bestaan en betrokkenheid by ons, beleef, kan ons nie anders as om daarop te wil reageer nie. Hierdie reaksie is 'n dryfveer — gehelp deur die aandrywing van die Heilige Gees — om so te leef dat ons lewens waardig is van God se groot liefde en om te getuig van die realiteit van wie Hy is.