Dave Ramsey se Finansiële Wysheid uit SpreukeVoorbeeld

Dag 7: Saamwerk

Ek hou daarvan om met geldsake te werk. My vrou, Sharon, hou nie daarvan nie. Miskien kan jy jouself dus my verbasing voorstel toe ek 'n paar jaar gelede ontdek het dat sy eintlik 'n paar menings oor geld gehad het.

Wat my egter regtig verbaas het, was hoe gereeld ek verkeerd en sy reg was!

Sharon voldoen aan al die ideale van 'n saggeaarde en deugsame vrou. Sy is nooit opdringerig om haar sin te kry nie, maar sy is geneig om "meeeeeenings" te hê as dit by groot besluite kom. Aanvanklik het ek nooit veel aandag aan daardie "meeeeeenings" gegee nie. Nadat my persoonlike trots egter ons gesin bankrot gelaat het, het ek geleer om hulle te vertrou.

Ek maak nou nie 'n groot skuif sonder Sharon se insig nie.

In die vroeë dae van my onderneming sou ek byvoorbeeld niemand aanstel voordat hulle saam met my en Sharon geëet het nie, want ek moes haar insette en wysheid hoor. Dit is iets wat ek vandag aan my leierskapspan oorgedra het. Ons maatskappy huur niemand totdat hulle 'n eggenoot-onderhoud met die departementsleier en sy of haar gade voltooi het nie.

Ek glo regtig Spreuke 31:10-11 is 'n voorskrif vir wyse finansiële besluite. As jy getroud is, is jy en jou huweliksmaat een. As jy 'n groot aankoop gaan maak of geld belê sonder om met jou gade te praat, werk jy net met die helfte van jou brein!

Die resultate hiervan is selde 'n seën. Elke keer as ek 'n groot besluit geneem het sonder Sharon se raad, het dit my baie hartseer besorg — en my baie geld gekos!

As jy enkellopend is, kan jy op jou aanspreeklikheidsvennoot staatmaak om daardie rol in jou lewe te speel. Hoe dit ook al sy, die punt is om van selfgesentreerde denke ontslae te raak, die plan hardop te deel, en ander toe te laat om jou te vertel as hulle dink dit 'n slegte idee is.

Ek sal erken dat 'n bespreking van geldsake 'n paar meningsverskille kan veroorsaak, maar dit is normaal en gesond in 'n huwelik. Onthou net dat jou gade nie die vyand is nie. Trouens, God het julle albei in dieselfde span geplaas om mekaar beter te maak. Wie weet — as julle kan saamstem oor die tjekboek, kan die enigste werklike geveg wat oorbly, wees oor wie die afstandbeheer kry.