Bly Getrou | Ses Maande in die Nuwe Testament — Daaglikse Leesstukke uit die Bybel Voorbeeld

Gebed

Jy gaan binnekort vandag se gedeelte lees. Voor jy dit doen, begin met 'n eenvoudige gebed soos hierdie een:

“Vader, ek nooi U om saam met my in hierdie oomblik te wees en vra dat U my hart ontvanklik maak vir u Woord. Help my om U intiemer te leer ken hierdeur, en dat ek sal toelaat dat u Waarheid my hart, gedagtes en siel vandag daardeur sal verander.”

Wanneer jy jou leeswerk voltooi het, wy ‘n paar minute aan die B.I.D.-siklus.

_________________

B — BEDAAR en raak rustig. Bepeins dit wat jy gelees het en laat toe dat die inligting by jou insink.

I — INNEEM Wat het God vandag deur sy Woord vir jou gesê? Sê ‘n Bybelvers hardop vir jouself en skryf dit miskien selfs neer.

D — DRA jou versoek om hulp aan God op. Die uitdaging is om in Jesus se teenwoordigheid te wees en meer soos Hy te word. Hoe daag vandag se Woord jou uit om dit te doen?

Ons Vader nooi jou liefdevol uit om in sy lieflike plan vir jou lewe, sy kerk en die wêreld te leef. Aanvaar sy uitnodiging om anders te leef en begryp dat sy plan groter is as wat ons kan bid of dink.

_________________

Agtergrond oor 1 Tessalonisense

Wie het die boek 1 Tessalonisense geskryf?

Volgens Christelike tradisie het die apostel Paulus 1 Tessalonisense geskryf. Dit is die eerste van twee briewe wat Paulus geskryf het aan die Tessalonisense.

Aan wie is die boek 1 Tessalonisense geskryf?

Hierdie brief is aan die gemeente in Tessalonika geskryf, wat Paulus in Handelinge 17 gehelp het om te stig. Die boek 1 Tessalonisense word beskou as een van Paulus se vroegste briewe, indien nie die eerste nie.

Konteks

Die gebeure wat beskryf word in 1 Tessalonisense vind plaas in die stad Tessalonika. Die boek 1 Tessalonisense is waarskynlik saamgestel gedurende Paulus se tweede sendingreis, tussen 48 en 52 n.C. Sy skielike vertrek uit Tessalonika so gou ná die stigting van die kerk het Paulus natuurlik besorg gelaat oor die toestand van die gelowiges daar. Toe Timoteus by Paulus in Atene aangesluit het (vgl. Handelinge 17:14-16), het sy besorgdheid Paulus oorreed om Timoteus dadelik terug te stuur na Tessalonika om die nuwe dissipels in die geloof aan te moedig en te versterk en om uit te vind hoe hulle vervolging verduur (vgl. 1 Tessalonisense 3:1-5). Hy het met 'n goeie verslag van hul geloof teruggekeer, en daarom skryf Paulus om hulle aan te moedig en te onderrig in die heilige lewe.

Literêre Styl

Die boek 1 Tessalonisense is 'n brief wat in prosavorm geskryf is aan die kerk in Tessalonika.

Hooftemas

• Heiligheid in jou hele lewe
• Jesus as die ware Koning van die wêreld
• Die hoop op Jesus se wederkoms

Struktuur

Die boek 1 Tessalonisense kan in twee gedeeltes verdeel word. Hoofstukke 1-3 begin deur die Tessalonisense se geloof en volharding te prys. Hoofstukke 4-5 volg met instruksies oor die goeie lewe en besonderhede oor Jesus se wederkoms.

_________________

Agtergrond oor 2 Tessalonisense

Wie het die boek 2 Tessalonisense geskryf?

Volgens Christelike tradisie het die apostel Paulus 2 Tessalonisense geskryf. Hierdie is die tweede van twee briewe wat Paulus geskryf het aan die gemeente in Tessalonika.

Aan wie is 2 Tessalonisense geskryf?

Hierdie brief is aan die gemeente in Tessalonika geskryf, wat Paulus in Handelinge 17 gehelp het om te stig.

Konteks

Die gebeure wat beskryf word in 2 Tessalonisense neem plaas in die stad van Tessalonika. Die boek 2 Tessalonisense is waarskynlik gedurende Paulus se tweede sendingreis tussen 48 en 52 n.C. geskryf, ongeveer 'n jaar nadat hy 1 Tessalonisense geskryf het. Uit die tweede brief blyk dit dat hulle ondanks vervolging sterk gebly het in die Here (vgl. 2 Tessalonisense 1:3-4). Uit hierdie brief blyk dit egter dat daar 'n misverstand oor die Here se wederkoms in die kerk was. Party van die lede was verontrus deur valse berigte (vgl. 2 Tessalonisense 2:1-2); ander het opgehou werk, miskien met die veronderstelling dat die Here se naderende wederkoms beteken het dat 'n mens nie meer hoef te werk nie (vgl. 2 Tessalonisense 3:11-12).

Literêre Styl

Die boek 2 Tessalonisense is 'n brief wat aan die gemeentes in Tessalonika geskryf is.

Hooftemas

1. Geduldige volharding in lyding
2. Hoop op die dag van die Here
3. Navolging van Jesus se selfopofferende liefde

Struktuur

Die boek 2 Tessalonisense kan in drie dele verdeel word. Hoofstuk 1 bied hoop te midde van volgehoue vervolging. Hoofstuk 2 verduidelik die komende dag van die Here. Hoofstuk 3 stel 'n uitdaging aan mense wat geweier het om te werk.