Bly Getrou | Ses Maande in die Nuwe Testament — Daaglikse Leesstukke uit die Bybel Voorbeeld

'n Brief van The Bridge kerk:

Die missie van elke Christen is om saam met Jesus te wandel en soos Hy te word — ter wille van die wêreld. Dit begin alles op een plek: die Woord van God. Om saam met Jesus te wandel, behels dat ons eerstens tyd saam met Hom deurbring. God wil hê dat ons Hom leer ken — nie net kennis van Hom dra nie — en om die Skrif te bestudeer, is een fundamentele manier hoe ons in ons verhouding met Hom kan groei.

Bly Getrou is 'n leesplan wat jou sal help om gedurende die volgende ses maande die Nuwe Testament te lees en te oordink. Ons hoop dat hierdie studie saam met ons aan jou 'n honger vir die Woord van God sal besorg, asook 'n dieper geloof met elke gedeelte wat jy lees.

Hier is 'n paar gedagtes om in aanmerking te neem voor jy begin:

• Wees toegewyd. Soos met enige leesplan, is dit belangrik om daarmee vol te hou! Wanneer jy 'n dag mis of agter raak, moenie moedeloos word nie! Maak weer jou Bybel oop en gaan voort! Ons het selfs weeklikse "inhaaldae" ingebou om jou te help as jy dit nodig sou kry.
• Delf dieper. Daag jouself uit om dieper in die leesstuk te delf deur 'n gepaardgaande joernaal te hou — lees, ondersoek, pas toe en bid elke dag deur die Skrifgedeeltes. Ons praat meer oor hierdie metode op die volgende bladsy.
• Moet dit nie alleen doen nie! Jy sal hierdie waarheid verskeie kere gedurende hierdie tydperk in die Skrif lees, want God het ons geskep om in 'n gemeenskap te fuksioneer! Terwyl jy sy Woord inneem en dit toelaat om jou te verander, deel jou reis met ander mense en vertel hulle hoe God aan die werk is!

Matteus 4:4 sê: “... Daar staan geskrywe: 'n Mens leef nie net van brood nie maar van elke woord wat uit die mond van God kom." Hier sien ons dat die Skrif so 'n groot doel in ons lewens as gelowiges dien, dat dit beide lewegewend en lewensonderhoudend is. Ons kan baie dinge inneem tydens ons lewens, maar niks so lewensveranderend as die Woord van God nie.

As 'n kerk sien ons uit daarna om saam met jou deur die Bybel te lees. Ons bid dat God hierdie reis deur die Skrif sal gebruik om jou te lei om met God te wandel en meer soos Hy te word, ter wille van die wêreld.

Gebed

Jy gaan binnekort vandag se gedeelte lees. Voor jy dit doen, begin met 'n eenvoudige gebed soos hierdie een:

“Vader, ek nooi U om saam met my in hierdie oomblik te wees en vra dat U my hart ontvanklik maak vir u Woord. Help my om U intiemer te leer ken hierdeur, en dat ek sal toelaat dat u Waarheid my hart, gedagtes en siel vandag daardeur sal verander.”

Wanneer jy jou leeswerk voltooi het, wy ‘n paar minute aan die B.I.D.-siklus.

_________________

B — BEDAAR en raak rustig. Bepeins dit wat jy gelees het en laat toe dat die inligting by jou insink.

I — INNEEM Wat het God vandag deur sy Woord vir jou gesê? Sê ‘n Bybelvers hardop vir jouself en skryf dit miskien selfs neer.

D — DRA jou versoek om hulp aan God op. Die uitdaging is om in Jesus se teenwoordigheid te wees en meer soos Hy te word. Hoe daag vandag se Woord jou uit om dit te doen?

Ons Vader nooi jou liefdevol uit om in sy lieflike plan vir jou lewe, sy kerk en die wêreld te leef. Aanvaar sy uitnodiging om anders te leef en begryp dat sy plan groter is as wat ons kan bid of dink.

_________________

Agtergrond oor die boek Matteus

Wie het die boek Matteus geskryf?

Alhoewel die boek anoniem is, verbind die vroegste, betroubare Christelike tradisie dit met Matteus, 'n tollenaar en dissipel van Jesus.

Vir wie is Matteus geskryf?

Die Evangelie volgens Matteus is onomwonde vir 'n Joods-Christelike gehoor geskryf, wat in daardie omgewing gewoon het. Die Evangelie volgens Matteus het die mees Joodse inslag van al die Evangelies. Die gemeenskap vir wie Matteus geskryf het, was 'n Joods-Christen gemeenskap wat in spanningsvolle tye geleef het in die tydperk van herbou na die eerste opstand. Dit wil voorkom asof hulle al 'n geruime tyd daar was.

Konteks

Die gebeure wat in Matteus beskryf word, het tydens die vroeë eerste eeu, tussen 10 v.C. en 40 n.C., in Jerusalem, Judea, Samaria en die omliggende streke in die Grieks-Romeinse Ryk plaasgevind. Die boek is waarskynlik tussen 50 en 90 n.C. geskryf.

Literêre Styl

Die boek Matteus is as 'n vertelling geskryf met sekere gedeeltes wat gesprekvoering behels.

Hooftemas

1. God se seën oor Israel en die nasies
2. God se nabyheid aan sy mense
3. Hoop vir en lewe in die Messiaanse koninkryk van God

Struktuur

Matteus is in sewe dele ingedeel. Hoofstukke 1-3 en 4-7 stel vir Jesus as Messias en ook die koninkryk van God bekend. Hoofstukke 8-10, 11-13, en 14-20 nooi mense uit om die krag van die koninkryk te ontvang. Hoofstukke 21-25 en 26-28 eindig met Jesus se kruisiging en opstanding.