Lewe Deur Die Gees: Oordenkings Deur John PiperVoorbeeld

Die Gees Vernuwe Ons Liggame

Omdat die Gees van Hom deur wie Jesus uit die dood opgewek is, in julle woon, sal Hy deur wie Christus uit die dood opgewek is, ook julle sterflike liggame lewend maak deur sy Gees wat in julle woon — Romeine 8:11.

God is besorg oor jou liggaam. As Hy nie was nie, sou Hy dit in die graf laat verrot het. Hy doen dit egter nie. God het jou liggaam gemaak tot sy eer.

Daarom sal Hy jou liggaam lewend maak deur sy Gees, ongeag van hoe dit lyk. Hy sal dit sterk, gesond en mooi maak. Soveel so dat as ek dit sien, sal ek sê: "Jy is soos die wye blou lug op 'n helder somersdag. Jy is soos die mooi van 'n miljoen sterre op 'n donker nag. Jy skyn soos die son; ja, in jou sien ek die glorie van Jesus Christus wat jou gemaak, verlos, lewend gemaak en verheerlik het met sy glorie, vir ewig en altyd."

Waaruit kan 'n mens krag put om in liefde voort te gaan in hierdie lewe waar daar so min aardse belonings is? Waaruit kan 'n man of sy vrou emosionele krag put om aan te hou gee wanneer die ander een nie ook gee nie? Waar kry 'n man en vrou wat graag wil trou, die krag om nogtans vir sewentig jare enkellopend te bly? Waaruit het Jesus sy krag geput om die kruis te verduur en nie vir die skande daarvan terug te deins nie? (Hebreërs 12:2)

Vir die vreugde wat vir ons met die opstanding in die vooruitsig gestel is, verduur ons enigiets vir Christus. Jesus het nie beloof dat mense se gehoorsaamheid aan Hom in hierdie lewe beloon sou word nie. Ons vreugde kom van die onwankelbare hoop van Romeine 8:11, nie van die veranderende omstandighede in ons lewe nie. "Omdat die Gees van Hom deur wie Jesus uit die dood opgewek is, in julle woon, sal Hy deur wie Christus uit die dood opgewek is, ook julle sterflike liggame lewend maak deur sy Gees wat in julle woon."

As jy werklik glo dat God vir jou en nie teen jou is nie en dat Hy jou liggaam lewend sal maak deur sy Gees wat in jou woon en dat enigiets goed wat jy in hierdie lewe prysgee, sal jy honderd keer soveel terug ontvang met die opstanding van die regverdiges (Markus 10:28-30). Jy sal soos die son in jou Vader se koninkryk skyn en 'n onuitputlike bron van krag om aan te hou om goed te doen, al waardeer niemand dit nou nie.

Lees meer: http://www.desiringgod.org/messages/the-spirit-will-give-life-to-your-mortal-bodies