Sosiale gesonde verstand in 'n Insta-wêreldVoorbeeld

Het jy al ooit iets ongemaklik of laf gedoen net omdat almal dit doen? Soos die "ALS Ice Bucket"-Uitdaging? Die "Cinnamon"-Uitdaging? 'n TikTok-dansuitdaging?

Selfs as jy nie het nie – of nog nooit vantevore by Instagram of Facebook aangeteken het nie – word jy nogtans deur sosiale media beïnvloed. Dit verander hoe jy inkopies doen, wat jy eet, vir wie jy stem, waar jy geld skenk, hoe jy oefen, hoe jy jou kinders opvoed, watter boeke jy lees en waaroor jy aan die etenstafel gesels. Sosiale media sal dit wat vir jou belangrik is beïnvloed. Wat jou tyd werd is. Waarin jy glo en waarvoor jy lief is.

Sosiale media kan ten beste 'n "Titus 2"-ervaring wees. Van stiltetyd-idees en gebedstrategieë tot gasvryheidswenke, die mense wat ons aanlyn volg kan ons “leer wat reg is”. Die tyd wat ons aanlyn deurbring, kan 'n kragtige hulpmiddel wees om ons te beïnvloed om daar waar ons is vir Jesus te volg.

Ons kan wel ook die pad byster raak. Ons raak verward oor ons eie gawes en wat ons kan aanbied, en beywer ons om ons gawes aan te pas by dit wat ons aanlyn sien. Ons wantrou God se plan vir ons lewens, soek ander opsies en paaie. Ons identiteit wankel namate te veel invloede na ons roep, wat ons vertel wat om te doen en hoe om te lewe.

Dit is dus die moeite werd om tyd af te staan om 'n sosiale media-voer saam te stel wat jou tot Bybelse getrouheid sal beïnvloed. Vra jouself af: "Beïnvloed hierdie persoon my tot dit wat waar, goed en mooi is? Help hulle my om my in Christus te verlustig en in Hom tevrede te wees?”

Kom ons kry een ding reg: om deur ander beïnvloed te word, is nie noodwendig 'n slegte ding nie. Dit is deel van God se plan vir ons, en ons kan dit nie verander nie. Die vraag om te vra is egter: wat — of wie — is jou primêre invloed?

Is God se woorde vir jou die belangrikste? Is jou weë in ooreenstemming met sy weë? Word jy gedryf deur dieselfde liefde? Jesus is die volmaakte invloed, ons groot Hoëpriester, en sy hart is aan ons s'n gebind. Hy belowe om ons te help in ons tye van nood (Hebreërs. 4:16) en het die Gees gestuur om ons te lei (Romeine. 8:14). Soos Paulus op pad na Damaskus, Saggeus in die boom, die vrou by die put en Ragab in haar huis, moet ons ons oë op Christus rig, en sal omliggende invloede minder krag hê.

Ek het onlangs vir my kinders ’n lofsang uit my kinderdae geleer om hulle te help om na die Here toe te hardloop wanneer die wêreld se stemme swaar en verwarrend voel. Miskien, met 'n klein, hedendaagse wysiging, kan dit vir ons almal van hulp wees: “Hou jou oë op Jesus, kyk op in sy wonderlike gesig, en die aardse invloede word nietig en klein in die lig van sy heerlikheid en genade."