Leef met VisieVoorbeeld

"Seënbaar"

Daar is sekere dinge wat God verkies om te seën. Byvoorbeeld gehoorsaamheid. Daar is ander dinge wat Hy weier om te seën. Soos ongehoorsaamheid.

As iemand met 'n visie, is dit noodsaaklik dat jy seënbaar bly. Om dit eenvoudig te stel, jy moet voldoen aan, en jou span lei om te voldoen aan 'n stel geloofsoortuigings en optredes wat die grondbeginsels van die Skrif weerspieël. Jou besigheid of bediening mag moontlik spesifieke toepassings van hierdie grondbeginsels ontwikkel wat jou onderskei van mededingers en soortgelyke organisasies, maar wat ten minste die standaarde bevestig wat in die Skrif voorgeskryf word.

2 Kronieke sê dat die Here diegene wie se harte ten volle op Hom gerig is, kragtig ondersteun. Dus, laat ek jou vra: Hoe belangrik is dit vir jou dat die Here dit waarmee jy besig is, kragtig ondersteun? As dit belangrik is, dan moet jou hart geheel en al Syne wees. Wanneer jy dit bevestig wat vir Hom belangrik is, bring jy jou hart in ooreenstemming met Syne. Wanneer jou hart volkome Syne is, kan jy geseën word.

Jou kernoortuigings en optredes kan in twee kategorieë verdeel word: algemeen en spesifiek.

Algemene oortuigings en optredes is daardie waaraan elke gelowige moet voldoen. Dinge soos eerlikheid, reinheid en integriteit moet ten volle aangeneem word ongeag die aard van jou visie.

Die nalaat om aan die algemene standaarde van eerlikheid en reinheid te voldoen, het al veroorsaak dat ontelbare visies skipbreuk gely het. Ons het almal al visies gesien wat geruïneer is deur finansies wat nie korrek hanteer is nie en onopgeloste konflik in verhoudings. Hierdie twee dinge, tesame met 'n gebrek aan sedelikheid, geld vir byna elke visie waarvan ek bewus is wat nie geslaag het nie.

Spesifieke oortuigings en optredes is spesifiek tot jou betrokke visie. Ek kan dus nie vir jou sê wat dit vir jou sal wees nie. Jy sal dit self met God se hulp moet uitpluis.

Laat ek 'n voorbeeld gee om dit te demonstreer. Jare gelede, het Billy Graham verkies om nie vir persoonlike optredes vergoeding te ontvang nie. Alle honorarium tjeks moes aan die Billy Graham Genootskap gerig word. Daardie reël verskyn nie in die Skrif nie, maar dit was 'n standaard wat Billy Graham geglo het belangrik was om die integriteit van sy bediening te handhaaf.

Dink jy God het vir Billy Graham kragtig ondersteun? Ek dink beslis so. Ek weet jy wil dieselfde soort seëninge hê terwyl jy jou visie nastreef. Dus, maak jouself seënbaar.

Stel 'n lys op van sowel algemene as spesifieke oortuigings en optredes wat van toepassing op elkeen van jou visies is.