Verspotte GeloofVoorbeeld

Stel Jou Dit Voor

As jy nie kan uitwerk wat jou eerste stap van geloof moet wees nie, gebruik die wonderlike ding wat God jou gegee het om in klein treetjies te loop. Dit word jou verbeelding genoem. 

Verbeelding is nie net vir kinders nie; dit is 'n magtige dryfkrag wat deur ons Skepper aan ons gegee is. Die kernwoord is beeld, en ons is na God se beeld geskape met die krag om ons dit te verbeel wat nog nie tasbaar is nie, maar 'n werklikheid kan word. Dis verspot! Jy het dalk opgehou om jou verbeelding te gebruik omdat iemand vir jou gesê het jy moet groot word en soos 'n volwassene optree, maar ek sê vir jou, dit is tyd om dit weer te laat herleef. Verbeelding is te kragtig om dit in die speelgoedkas te los. 

Jy kan op 'n plek wees wat presies die teenoorgestelde is van waar jy wens jy was, dan kan jy jou oë toemaak en jouself sien presies waar jy wil wees. (Toe nou — probeer dit!)

Jy kan bedlêend wees, met jou hele lyf in gips, maar wanneer jy jou oë toemaak, kan jy jou verbeel jy is gesond en loop weer rond.

Jy en jou kinders kan wakker word in jou een slaapkamer woonstel terwyl julle luister na die water wat in 'n emmer drup onder die plek waar die plafon die laaste keer begin lek het, maar dan maak jy jou oë toe en jy sien jouself waar jy die sleutels ontvang van jou pragtige nuwe vier slaapkamer huis, met twee badkamers, in 'n veilige, stil woonbuurt.

Jy kan dalk met Kersfees aan die etenstafel sit langs jou dronk oom en ander gesinslede wat oor die tafel met mekaar baklei. Dan maak jy jou oë toe en sien 'n gesin wat vol vrede en vreugde saamkuier waar almal liefde aan mekaar bewys en getuienisse van God se getrouheid aan mekaar vertel.

Jy kan selfs in 'n tronksel wees en die dae aftel totdat jy weer jou kind kan vashou. Wanneer jy jou oë toemaak, verbeel jy jou jy is by haar sewende verjaarsdag partytjie, en jy neem foto's van glinsterende eenhorings en prinsesse met tiaras. 

Moenie jou verbeelding geringag nie! Dit is deur God aan jou gegee. Dit is Goddelik. Daardie dagdrome kan God wees wat aan jou 'n vlugtige blik van die toekoms gee oor wat vir jou moontlik is as jy Hom net genoeg sal glo om aan te beweeg.

As jy een verhouding, een situasie in jou lewe, een deel van jou daaglikse lewe kon verander, wat sou dit wees? Maak jou oë toe en begin om jou te verbeel. Vra dan vir God om jou drome in werklikheid te omvorm.