Ten volle Toegewyd: SkeppingVoorbeeld

Hulle Het Geen Skaamte Gevoel Nie

Hierdie deel van die Bybelse verhaal eindig met 'n pragtige prentjie van hoe die wêreld voor die sondeval was, en dien ook as 'n onheilspellende vooruitskouing van die paradys wat binnekort verlore sou gaan. 

Aan die einde van Genesis 2 lees ons: 

"Hulle twee die mens en sy vrou, was kaal, maar hulle was nie skaam nie" Genesis 2:25.

Vir die meeste van ons klink dit soos 'n sprokie om 'n wêreld voor te stel waarin ons nie skaam is nie. Ons kan maklik iets vind om oor skaam te wees. Soms word daardie skaamte deur ander op ons gelê, en soms lê ons dit op onsself. 

Nietemin, as ons skaam voel, is ons reaksie om dit waaroor ons skaam is, weg te steek en te bedek. In ons pogings om ons skaamte te bedek, skep ons egter 'n hindernis tussen ons en ander — insluitend God.

Die krag van hierdie vers is dat die eerste mense heeltemal eerlik en opreg met God en mekaar kon wees. Dit is hoe dinge veronderstel is om altyd te wees. Daar was geen plek vir skaamte in God se goeie wêreld nie. 

In die begin was mense heeltemal kwesbaar en het geen skaamte ervaar nie. Hulle verhoudinge met mekaar en met God is op liefde in plaas van vrees gebaseer. Genade in plaas van skaamte. Vertroue in plaas van agterdog. Eerlikheid in plaas van misleiding. Kwesbaarheid in plaas van onsekerheid. 

Omdat hierdie lewenswyse in die sondeval verlore gegaan het, is dit weer deur Jesus teruggeneem. 

Jesaja het hieroor gepraat toe hy geprofeteer het oor die komende jaar van die Here se guns. Hy het verklaar 'n dag was op pad wanneer God se Messias sou kom:

"... om 'n blye boodskap te bring aan die mense in nood. Hy het my gestuur om dié wat moedeloos is, op te beur, om vir die gevangenes vrylating aan te kondig, vryheid vir dié wat opgesluit is ..." Jesaja 61:1. 

'n Paar verse verder skryf Jesaja: 

"In plaas van vernedering sal julle twee keer soveel besittings hê as tevore, in plaas van minagting sal julle lof ontvang oor wat julle besit. Julle sal in julle land twee keer soveel besit as tevore en julle sal altyd vreugde hê" Jesaja 61:7. 

Jesaja het uitgesien na die dag waarop die Messias, die Uitverkorene van God, sou kom en dinge begin regstel. Hy het uitgesien na die dag waarop Jesus sou kom om die mensdom van sonde te verlos en van hulle skaamte bevry. 

Dit was Jesaja 61 waaruit Jesus gelees het toe Hy sy opdrag in die evangelie van Lukas aangekondig het. Van die begin af was dit God se plan om die skade van die sondeval om te keer en sy goeie skepping te herstel. Ons is deur Jesus bevry van sonde en is geroepe om ander te help om die vryheid wat in Hom beskikbaar is, te ontdek. 

Joernaalvrae 

• Skaamte was nooit iets wat ons moes ervaar nie. Onthou jy die eerste keer dat jy 'n gevoel van skaamte ervaar het?
• Op watter manier kan jy deelneem aan Jesus se opdrag om die skade van sonde ongedaan te maak deur 'n hindernis in jou gemeenskap te verwyder?
• Watter onsekerheid kan jy kies om oor kwesbaar te voel en met jou gemeenskap te bespreek?

Memoriseervers

"Nee, God het ons gemaak wat ons nou is: in Christus Jesus het Hy ons geskep om ons lewe te wy aan die goeie dade waarvoor Hy ons bestem het" Efesiërs 2:10.