Ten volle Toegewyd: SkeppingVoorbeeld

Dit Het Aand Geword en Dit Het Môre Geword

Die tyd het aangebreek om 'n vraag te beantwoord wat baie mense vra: het God werklik die heelal in ses dae geskep? Indien wel, is dit nie in stryd met alles wat wetenskaplikes die afgelope eeu ontdek het nie?

Eerstens, moet ons onthou dat die Bybel nie 'n handboek is met die antwoorde op al ons vrae nie. Dit is eerder 'n verhaal wat ons na Jesus lei en ons verander om meer soos Hy te wees. Die Bybel is in 'n wye verskeidenheid literêre genres geskryf deur skrywers wat op verskillende tye, plekke en kulture as ons geleef het. 

Een van die vinnigste maniere om Genesis 1 en 2 verkeerd te verstaan, is om hierdie hoofstukke te behandel as 'n laboratoriumverslag wat presies beskryf wat gebeur het en hoe dit gebeur het. Dit sou ons moderne aannames op 'n antieke teks afdwing, in plaas daarvan om goeie studente van ons kultuur te wees. 

Tweedens, daar is baie mense wat glo dat Genesis 1 as Hebreeuse poësie geskryf is. Dit beteken dat ons wysheid moet gebruik en leer om hierdie gedeeltes van die Skrif literêr te lees en nie net letterlik nie. Dit nooi ons weer om ons moderne vrae opsy te sit en in die konteks van die Bybelse skrywers te tree. As ons dit doen, sien ons hoe Genesis poëties geskryf en gestruktureer is. 

Derdens, daar is nie presies dieselfde hoeveelheid woorde in Afrikaans as in Hebreeus nie. Dit beteken dat dieselfde Hebreeuse woorde dikwels vertaal word as soortgelyke Afrikaanse woorde, afhangende van die konteks. Byvoorbeeld, die Hebreeuse woord vir "dag" wat in Genesis 1 gebruik word, is yom — en yom kan verskeie dinge beteken, afhangende van die konteks. Dit kan 'n letterlike tydperk van 24 uur beteken, of die tyd wanneer die son op is, of 'n jaar, of selfs 'n lang, maar afgebakende tydperk. 

Hierdie besonderhede maak saak, want as ons hierdie gedeelte van die Skrif deur die lens van die oorspronklike gehoor sien, is dit 'n revolusionêre herformulering van wie God werklik is en wat dit beteken om 'n mens te wees. 

Moet dus nie hierdie Skrif as 'n laboratoriumverslag lees nie, want dit kan 'n struikelblok of padblokkade vir ons geloofsreis word. Jy kan 'n getroue volgeling van Jesus wees wat glo in 'n letterlike skepping van ses dae, of jy kan 'n getroue volgeling van Jesus wees wat glo dat die heelal miljarde jare gelede gevorm is. Die belangrikste vraag is nie: "Is Genesis letterlik of beeldspraak?" nie. Die belangrikste vraag is: Wie is Jesus vir my? 

Joernaalvrae 

• Het jy al ooit gedink wat hierdie gedeelte van die Skrif — of enige ander gedeelte — vir die oorspronklike gehoor sou beteken het? Waarom of waarom nie?
• Wat sou aan jou vrae verander het as jy die Bybel vanuit die perspektief van die oorspronklike gehoor benader het? Skryf een of twee vrae neer wat jy sou vra. 
• Begin deur jouself in die skoene van die oorspronklike gehoor te plaas —  'n onlangs bevryde Hebreër. Wat vertel hierdie gedeelte jou oor God?

Memoriseervers

"Nee, God het ons gemaak wat ons nou is: in Christus Jesus het Hy ons geskep om ons lewe te wy aan die goeie dade waarvoor Hy ons bestem het" Efesiërs 2:10.