Hoop Vir ’n Nuwe DagVoorbeeld

Sien jy die lig?

Sielkundiges het ’n eksperiment gedoen deur ’n klomp rotte te neem, hulle in ’n drom met water te sit, die deksel op te sit en te kyk hoe lank hulle aanhou swem. In ’n tweede emmer het hulle dieselfde gedoen, met die een verskil: Hulle het ’n gaatjie in die deksel gemaak sodat lig daardeur kon skyn. Die interessante uitkoms was: Die rotte in hierdie drom het amper vier keer langer geswem as die rotte in die pikdonker emmer. Iets in hulle het instinktief bly glo dat daar lewe in die lig is.

Ons mensdom is niks anders nie. Solank daar nog lig is, sal ons die innerlike krag en moed vind om aan te hou, vas te byt … te bly hoop op ’n uitkoms. Dis wanneer ons alle hoop op lewe in ons donker wêreld verloor het, wat ons psige maklik tou opgooi. Ons ophou om regtig te léwe.

Jy het God – dié Lig – bo, langs en onder jou. Jy het die Een wat groter as jou grootste donker is, ín jou. Sien jy dié Lig?

EK KYK OP EN WEET: U ÍS OOK MÝ LIG.