In gesprek met my HereVoorbeeld

Antwoord op gebed

In sy boek Miracles gesels C.S. Lewis oor gebed. Iemand wat wetenskaplik kan bewys dat ’n gebeurtenis deur sy gebed veroorsaak is, sal soos ’n towenaar voel, sê hy. Die kans is goed dat hy ’n groot kop sal kry. Dit is presies wat met koning Hiskia gebeur het. Wanneer die Here sy gebed verhoor en ’n wondergenesing bewerkstellig (2 Kon. 20), is Hiskia glad nie dankbaar nie — die Bybel berig dat hy ingenome met homself geword het sodat die toorn van die Here oor hom én Juda ontvlam het.

Dis beter om te glo dat alles wat gebeur antwoorde op ons gebede is, of dit nou ons versoeke is wat toegestaan óf geweier word. Alle gebede word gehoor, alhoewel alle gebede nie vérhoor word nie, sê Lewis. Miskien het jy ook al wonderantwoorde op jou gebede ontvang — indien dit gebeur het, mag jy jou nooit daaroor aanmatig nie. God is soewerein en alwetend. Hy weet áltyd wat die heel beste antwoord op jou gebed is, ook wanneer hierdie antwoord hemelsbreed verskil van die een wat jý graag wou hê. Weet dat God elkeen van jou gebede sal hoor — ook al is daar baie van hulle wat Hy nie na die letter verhoor nie.

Vader, ek weet dat U elkeen van my gebede op die heel beste manier beantwoord. Vergewe my dat ek soms wonder waarom U nie alles gee wat ek graag wil hê nie. Amen.