Skep 'n Beter NormaalVoorbeeld

Beheer Teenoor Tevredenheid 

Ons het gesamentlik ontdek dat ons nie soveel beheer oor ons lewens het as wat ons gedink het nie. Dus, waar laat dit ons? Hoe kan ons ophou om ons lewens te beheer en eerder tevredenheid daarin te begin vind? 

Wanneer ons daarop ingestel is om alles om ons te beheer, verwaarloos ons dikwels die werk wat God in ons wil doen. Een van die grootste maniere om die behoefte aan beheer te beveg, is om tevredenheid te ontwikkel. Dink daaroor. Wanneer ons in die versoeking kom om te beheer, is dit dikwels omdat ons dink dat ons 'n beter lewe vir onsself of ander kan skep. Wanneer ons egter tevrede is, is ons net dankbaar vir wat God ons gegee het. 

Tevredenheid beteken nie dat ons nie verandering in ons lewens kan soek nie. Dit beteken wel dat ons verandering soek uit 'n houding van dankbaarheid, nie uit 'n houding van gierigheid nie. 

Dit word verduidelik in een van die gelykenisse van Jesus. Hy vertel 'n verhaal van 'n ryk man wat nie genoeg ruimte het om sy oes te stoor nie. Die man besluit om sy skure af te breek om groteres te bou sodat hy al sy graan en ander goed kan opgaar en stoor. Hier is God se antwoord: 

“Maar God het vir hom gesê: ‘Jou dwaas! Vannag nog sal jy sterf. En alles wat jy bymekaargemaak het, wie sal dit kry?’ Ja, ‘n mens is 'n dwaas as jy net aardse rykdom versamel, maar nie ’n ryk verhouding met God het nie” (Lukas 12:20-21 NLV). 

Die man het 'n probleem gehad, en in plaas daarvan om God vir wysheid te vra oor wat om te doen en God vir al sy hulpbronne te bedank, het hy beheer oor die situasie oorgeneem. In werklikheid het ons egter nie beheer nie. Ons weet nie hoe lank ons hier op aarde is nie, en ons weet nie wat môre gaan gebeur nie. In plaas daarvan om ons te bekommer oor dinge wat buite ons beheer is, kan ons dus begin om tevrede te wees om te weet dat God in beheer is, en Hy vertrou kan word. 

Wanneer ons in die versoeking kom om dinge in ons lewens te begin beheer, laat ons eerder begin om God te dank dat Hy soewerein oor ons lewens heers. Beheer vertel ons dat ons ons eie geluk kan skep. Tevredenheid sê dat God ons rede gegee het om ons in alle omstandighede te verheug. 

Trouens, tevredenheid is een van die wenke wat Paulus ons gee in Filippense 4 om teen angs te stry. Hy sê om met 'n gesindheid van danksegging na God toe te gaan, en hy skryf later dat ons ons gedagtes moet rig op dinge wat prysenswaardig is. Kom ons hou op om beheer te probeer neem en begin erken dat God die Een is wat beheer het. Daarom kan ons tevrede wees, selfs wanneer dinge onseker lyk. 

Kom ons skep 'n beter normaal vir ons lewens deur God meer gereeld in ons lewens binne te nooi, wetende dat Hy vertrou kan word om elke situasie te beheer en om goeie dinge te bewerkstellig in elke tydperk. 

Bid: Vader, help my om my begeerte na beheer te beveg deur tevredenheid te soek en toe te pas. U alleen is waardig om te beheer, en ek vertrou U. Dankie vir al die seëninge wat U my gegee het. Help my om hulle goed te bestuur, teen gierigheid te stry en tevredenheid te vind. In die Naam van Jesus. Amen. 

Uitdaging: Maak 'n lys van dinge waarvoor jy dankbaar is, en dank God dan daarvoor. 

As jy van hierdie leesplan gehou het, sal jy van die potgooi hou wat daarmee gepaard gaan. Vind dit hier: www.life.church/youvehearditsaid