Hoe is God? 'n 21-dag LeesplanVoorbeeld

God Is Goed

Psalm 119 verklaar dat God goed is en goed doen (Psalm 119:68). Ons almal beleef egter dinge wat veroorsaak dat ons God se goedheid bevraagteken. 

Wanneer jy voor moeilike besluite of uitdagende omstandighede te staan kom, mag jy jouself dalk afvra: "As God goed is, hoekom laat Hy toe dat slegte dinge gebeur?" Dit is 'n natuurlike reaksie wanneer jou lewe onderstebo gekeer is. Dit is moeilik om van 'n goeie Vader te sing wanneer jy siekte, onvrugbaarheid of werksverlies in die gesig staar. 

Die beste manier om twyfel oor God se goedheid uit die weg te ruim, is om die belangrikheid van perspektief te verstaan. Selfs God se Seun moes moeilike en pynlike dinge in die gesig staar terwyl Hy op aarde was. Hy is gemartel en het 'n pynlike, onregverdige dood verduur. Jesus se dood en opstanding het egter vir ons die weg gebaan om met God versoen te word. God het iets wat skynbaar sleg was, gebruik om iets goeds te doen.

Ons kan soms na pynlike tydperke terugkyk en sien hoe God dit uiteindelik ten goede laat meewerk het. Daar sal egter tye wees wanneer jy nie die doel van jou pyn hier op aarde ten volle sal begryp nie.

Solank as wat ons deel is van 'n gebroke wêreld sal slegte dinge met ons gebeur. Jesus het egter gesê: “... hou moed: Ek het die wêreld klaar oorwin” (Johannes 16:33b). Wanneer ons in 'n verhouding met Jesus staan, het ons die hoop om vir ewig saam met God in die hemel te wees, ongeag die bose wat ons in die wêreld moet trotseer.

Romeine 8:28 sê: "Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is." Ons kan vertrou dat God goed is, selfs wanneer ons omstandighede nie sin maak nie. Ons kan dinge nie soos God sien nie, maar ons kan vertrou dat, vanuit sy perspektief, al ons pyn tot iets goeds sal meewerk.

Oordink die volgende:

• Watter omstandighede het veroorsaak dat jy God se goedheid bevraagteken?
• Hoe word jou aannames oor God se goedheid beïnvloed as jy sy perspektief in ag neem?